E proyecto di vivienda na Burubundu ta sigui den fase di preparacion, mientras Gobierno di Aruba ta trahando riba diferente estudio tecnico, infrastructura y medidanan pa proteha naturalesa den e area.

Durante un entrevista cu Bon Dia Aruba, e Minister di Infrastructura Rene Herde a reacciona riba e preocupacionnan expresa door di COMPA, particularmente tocante e impacto ambiental, falta di informacion y e manera cu gobierno a presenta e proyecto na publico. E minister a expresa decepcion cu e declaracionnan di e organisacion, pero a enfatisa cu gobierno ta dispuesto pa considera recomendacionnan y sigui dialogo.

Segun minister Herde, e proyecto Burubundu ta representa un iniciativa importante pa atende e necesidad creciente di vivienda na Aruba. Sinembargo, el a reconoce cu un proyecto di e magnitud aki ta exigi preparacion cuidadoso, evaluacion tecnico y colaboracion entre diferente departamento di gobierno y companianan di utilidad.

Un di e puntonan principal di discusion ta relaciona cu e critica expresa door di COMPA despues di reunionnan cu representante di gobierno. E minister a indica cu e ta sumamente decepciona cu e manera cu e organisacion a presenta su preocupacionnan publicamente.

El a splica cu durante e reunionnan tabatin oportunidad pa intercambia informacion, haci pregunta y discuti diferente aspecto di e proyecto. E minister a describi e reunionnan manera constructivo, pero a indica cu algun declaracion publico haci despues no tabata refleha, segun e, e contenido di e combersacionnan.

Sinembargo, e minister a reconoce cu COMPA tin derecho di expresa critica, presenta obhecion y uza instrumento legal pa cuestiona decisionnan di gobierno. El a enfatisa cu Aruba ta un pais democratico y cu diferente organisacionnan tin derecho di participa den debate publico.

Un di e preocupacionnan principal ta e posible impacto di e proyecto riba naturalesa, particularmente e cercania di SpaansLagoen y e areanan di mangel. COMPA a cuestiona si e informacion ambiental disponible ta suficiente pa determina e consecuencianan di un desaroyo residencial di e magnitud contempla.

Minister Herde a rechasa e idea cu gobierno ta prepara pa destrui naturalesa sin considera e impacto ambiental. El a splica cu durante desaroyo di e proyecto, gobierno ta percura pa preserva mas tanto vegetacion natural posibel.

El a sigui splica cu e plan ta contempla un densidad residencial relativamente abao, di aproximadamente 20 unidad pa hectaar, precisamente pa evita cu e tereno ser ocupa completamente cu construccion.

Ademas, e mandatario a indica cu gobierno ta tumando e recomendacionnan di Departamento di Naturalesa y Medio Ambiente (DNM) y Aruba Conservation Foundation (ACF) seriamente. E evaluacionnan aki ta importante pa determina cua areanan mester ser proteha y cua condicionnan tecnico mester ser incorpora den e proyecto.

Tocante Spaans Lagoen, minister Herde a sigura cu e construccionnan proyecta no ta destina pa yega directamente na e mangelnan. E plan ta contempla suficiente distancia entre e construccion y areanan ambientalmente sensitivo.

El a agrega cu, si evaluacionnan tecnico adicional demostra cu algun construccion ta demasiado cerca di un area proteha, gobierno lo mester adapta e diseño.

Otro preocupacion importante ta e posibilidad cu awa sushi por afecta Spaans Lagoen. Minister Herde a indica cu gobierno no tin intencion di permiti pa awa sushi drenta e area natural.

Segun su splicacion, e proyecto ta contempla solucionnan tecnico pa tratamento di awa, incluyendo purificacion local y conexion cu sistema di rioolering di Aruba. Parti di e awa trata por ser uza pa mantenemento di vegetacion den e proyecto, mientras e resto lo ser procesa mediante e infrastructura corespondiente.

Minister Herde a señala cu e conexionnan di rioolering y otro facilidadnan basico ta forma parti di e preparacion cu gobierno ta discuti cu e companianan di utilidad.

E preparacionnan aki ta inclui tambe suministro di coriente, awa, telecomunicacion y otro servicio necesario pa e residentenan. E mandatario a expresa su preferencia pa instala kabelnan y tuberia bao di tera, enbes di crea un sistema cu infrastructura visible riba superficie.

Segun e, aunke e solucionnan aki por exigi inversionnan inicial mas grandi, nan por contribui na un desaroyo mas eficiente y sostenibel riba termino largo.

Minister Herde a indica cu gobierno ta considera absorbe parti di e gastonan relaciona cu infrastructura basico, cu e intencion di evita cu e inversionnan aki por haci e vivienda demasiado caro.

Durante e entrevista, tambe a ser cuestiona e estado actual di e proyecto y e informacion cu COMPA a inidca tocante un supuesto decision cu gobierno lo tuma dia 28 di october.

Minister Herde a aclaria cu gobierno no a tuma un decision grandi riba e fecha menciona cu ta cambia fundamentalmente e futuro di Burubundu. El a indica cu e proyecto ta avansando mediante reunionnan regular, evaluacion di recomendacionnan y preparacion di diferente componente tecnico.

El a splica cu e proceso no ta consisti di un solo decision, sino di diferente paso cu mester ser completa prome cu construccion por cuminsa.

El a indica cu tin recurso financiero limita reserva den presupuesto actual pa cuminsa algun preparacion, mientras inversionnan mas grandi den infrastructura basico ta contempla den presupuesto di e siguiente aña.

Entre e pasonan pendiente tin e coordinacion formal cu companianan di utilidad, evaluacion di e recomendacionnan ambiental y preparacion di e informacion tecnico necesario pa futuro destahonan publico.

Minister Herde a indica cu DIP, hunto cu otro instancia tecnico, ta participa den e proceso. El a señala cu e departamentonan ta enfrenta presion considerable debi na cantidad di trabao y limitacion di personal, pero nan ta sigui contribui na preparacion di e proyecto.

Otro asunto cu a genera pregunta ta e nivel di detaye di e verkavelingsplan, particularmente pasobra algun informacion tocante infrastructura, trafico y construccion ainda no ta completamente disponible.

Minister Herde a splica cu e plan presenta na publico ta un concepto inicial y no un diseño final cu ta inclui tur e specificacionnan tecnico.

El a señala durante e siguiente fasenan lo mester determina exactamente con e infrastructura lo ser instala, con e diferente tipo di vivienda lo ser distribui y cua facilidadnan adicional ta necesario.

E aspecto di trafico tambe ta forma parti di e evaluacion. Minister Herde a reconoce cu un desaroyo di varios shen of aproximadamente mil vivienda por genera un aumento considerable di vehiculonan den e area.

P’esey, el a indica cu sugerencianan presenta tocante acceso, circulacion y posible congestion di trafico lo ser considera durante e preparacion di e plan definitivo.

E proyecto ta contempla diferente tipo di vivienda, incluyendo casnan pa famia y unidadnan mas chikito pa persona cu ta biba nan so. El a menciona cu tin necesidad di crea opcionnan adecua pa diferente composicion familiar y nivel di entrada.

Segun su splicacion, gobierno ta considera dividi e proyecto den diferente seccion, cu cada seccion por inclui un cantidad y tipo specifico di vivienda. E construccionnan lo por ser ofrece mediante destaho publico, dunando diferente compania oportunidad pa presenta nan oferta.

Minister Herde a enfatisa cu gobierno no tin intencion di duna preferencia na un compania specifico. El a indica cu sector priva lo por participa den e proyecto mediante un proceso habri y transparente.

Durante e entrevista, e mandatario a contesta tambe e pregunta pakico gobierno a anuncia Burubundu prome cu tur estudio y detaye tecnico tabata cla.

El a splica cu e decision pa presenta e proyecto na publico tabatin dos proposito principal: demostra cu gobierno ta buscando solucion pa e escasez di vivienda y brinda comunidad oportunidad pa conoce e propuesta y presenta sugerencianan.

El a reconoce cu e proyecto ainda no ta cla pa construccion, pero a argumenta cu publica un concepto preliminar por contribui na un proceso di participacion y mehoracion.

El a señala cu e reaccionnan recibi tocante naturalesa, trafico, infrastructura y diseño di vivienda ta forma parti di e informacion cu gobierno por uza pa adapta e plan.

Na mesun momento, el a enfatisa cu e urgencia pa crea mas vivienda no ta nifica cu gobierno lo ignora ley, rekisito ambiental of procedimento tecnico.

El a enfatisa cu gobierno no ta cuminsa construccion sin e informacion necesario tocante condicion di tereno, infrastructura, evaluacion ambiental y otro rekisito aplicabel.

Minister Herde a reitera cu gobierno ta habri pa colaboracion cu organisacion y personanan cu ta desea di contribui na e proyecto, y cu e desacuerdo cu COMPA no lo cambia su meta pa aumenta e disponibilidad di vivienda na Aruba. Mientras tanto, Burubundu ta sigui den fase di preparacion, cu diferente aspecto ainda pendiente, incluyendo e estudionan ambiental, costo di infrastructura y diseño definitivo. E siguiente pasonan lo mester determina con gobierno lo incorpora e recomendacionnan tecnico y ambiental, buscando un balansa entre e necesidad di mas vivienda y proteccion di naturalesa.