Minister Lampe: Disputa riba cuentanan anual no entrega

ORANJESTAD – Ministro encarga cu enseñansa Rudy Lampe (RED) a duna den rueda di prensa ayera mainta un aclaracion encuanto e situacion alrededor di nombramento di miembro nobo pa e ‘College van Curatoren’ di Universidad di Aruba.

E mandatario a elabora riba e noticia, cu Bon Dia Aruba tambe a publica, cu lo tabatin problema entre e miembronan actual di e colegio y e ministro. E mandatario a desmenti cu tabata un conflicto, mas bien un diferencia di opinion. En todo caso no tabata berdad loke a keda publica den cierto medionan cu e lo tabata trata di pone un candidato di partido RED na Universidad di Aruba. E decision encuanto e miembronan nobo tuma a wordo aproba cu conseho di ministro, segun e mandatario a splica.

Nombramento den e colegio di curator a tuma lugar a base di candidate cu a ser presenta pa Universidad di Aruba. “E diferente facultad a bin cu nan nomber y nos a honra nan deseo. Esey a keda aproba diabierna ultimo. E curatornan nobo di Universidad ta mr. Sharine Luydens, director di Censo, drs. Angelo Brete, director di MOT, dr. Haime Croes, director di DIP y drs. Herry Koolman, director interino di CBS.”

Pa locual ta trata e renuncia di dos di e curatornan, e mandatario a splica cu no nan no a tuma nan retiro, sino cu ta nan periodo ta termina 1 di juni, pero e di tres persona si a entrega su retiro prome cu su tempo.

Referente na pregunta di miembro di prensa tocante e persona cu a retira prome cu tempo, si esey tabata pa motibo di e diferencia di opinion, e mandatario a bisa cu e persona cu a tuma su retiro ta Dolfi Richardson (ex-alto comisario di KPA y actualmente hefe di seccion Interpol Aruba. “Mi mes no a topa cu su persona pero e tabata parti di e colegio di curator y nan no tabatin e responsabilidad di presenta e jaarrekening.”

Segun e mandatario a remarca cu e diferencia di opinion entre e ministro y e curatornan ta cu e ministro ta haya inaceptabel cu durante ultimo añanan no a presenta un jaarrekening, e relato financiero manera ta stipula (den ley; red.) cu cada aña mester presenta un relato. Ministro Lampe a remarca cu aparentemente pa gobierno anterior duna cuenta financier no tabatin prioridad, loke ta haci cu placa di pueblo, pero cu e si ta mira esey como prioridad.

Cu e aprobacion actual, e directiva nobo lo cuminsa dia 1 juni pa continua cu e trabou sinembargo el a bisa cu e ta spera cu e curatornan nobo lo duna nan relato financiero na tempo y lo por discuti e situacion financiero di Aruba, cu no ta nada facil y con lo por usa e placa na e manera mas efectivo posibel locual ta toca e universidad.

 

You May Also Like

CAYA GRANDI PLAYA11.JPG

Comerciantenan den Caya Betico Croes ta pidi accion urgente

Den un carta cu ODA (Oranjestad Downtown Association) a manda pa gobierno riba 9 ...

DIP: niun info riba supuesto hotel nobo na Arashi

Den medio social nos a compronde cu tin un hotel nobo na caminda pa ...

“Rijbewijs actual no ta cumpli cu ley pa por vota cu ne”

Conseho Electoral ta declara cu e rijbewijs actual di Aruba no ta cumpli cu ...

image.jpeg

A gara persona haciendo trabou taxi pirata cu V-car

Den Caya Ernesto Petronia diaranson mainta e Polis di Bario Oranjestad durante su patruya ...

Pa ASTEC empleadonan a bay dilanti den compensacion

Apesar cu e compania ASTEC cu ta encarga cu operacion di e waf di ...