Diamars ultimo durante e reunion den parlamento riba situacion actual den enseñansa, minister di Educacion, Ciencia y Desaroyo Sostenibel, Armando ‘Rudy’ Lampe a trece algun data a base di un encuesta traha pa departamento di Enseñansa.

El a laga sa cu un 49% di e muchanan a señala cu durante e periodo aki cu no tabatin scol, nan por sigui haya educacion a distancia. Lampe a reconoce cu tambe cu un grupo di 51% mucha cu tambe tin derecho riba educacion, a resulta afecta.

E cifra cu e mandatario a trece dilanti den parlamento ta contradeci e cifra cu minister presidente, Evelyn Wever-Croes a trece dilanti pa argumenta e necesidad di gobierno pa habri scol bek. E mandatario a yega di señala cu un 60% di nos muchanan no a haya niun tipo di les for di 13 di maart ultimo, dia cu Covid-19 a bati nos porta cu dos caso positivo. Nos scolnan a wordo cera mas cu dos luna pasa pa evita e contagio di e virus aki.

El a sigui menciona cu e mesun encuesta aki a mustra cu alrededor di 79% di nos muchanan a indica cu nan tin internet. Pero mayoria di nan un device so nan tin pa hogar. Un situacion cu ta dificulta cu nan por haya les pareu ora cu tin mas cu un mucha den cas pa comparti e mesun device. Minister Lampe a declara cu esaki ta un punto cu nan ta bay traha riba dje. “Ya nos tin plan caba pa atende cu e parti aki,” el a bisa.

El a menciona cu e mesun encuesta aki a mustra cu un 21% di e muchanan no tabatin internet. E cifra aki produci pa e encuesta realisa pa departamento di Enseñansa a wordo confirma pa Setar mes. P’esey nan a dicidi di concentra riba e candidatonan pa examen, caminda Setar den gesto solidario a pone data gratis pa e studiantenan cu mester presenta nan examen final.

Segun Lampe e prioridad cu nan a duna na e candidatonan di examen final a duna su fruta. Ya cu a marca record riba e cantidad di studiantenan cu a slaag.

Maneho y digitalisacion

Minister Lampe a bisa cu gobierno ta cumpliendo cu e programa di gobernacion Hunto pa Aruba dor di ofrece diferente posibilidad riba tereno di digitalisacion di educacion. El a bisa cu e ta orguyoso di e programa aki di gobierno, pasobra e ta un ‘programa visionario.’ Un programa cu a anticipa e desaroyo cu mundo henter ta pasando aden.

Segun e mandatario e crisis aki a mustra cu esaki tabata e direccion corecto pa nos por a deal cu un crisis cu ‘nos no a pidi y cu a dal nos di sorpresa’.

 

El a bisa cu for di aña pasa nan a anuncia cu diligitalisacion den enseñansa ta asina importante den nan Plan di Educacion Nacional (PEN) 2030. Nan plan a brinda posibilidad pa sigui duna educacion, ya cu e facilidad digital a bira e medio cu por wordo uza pa tog e muchanan por keda haya educacion.

“No ta minister di Onderwijs ta impone cambio, manera ta wordo bisa,” asina e mandatario a reacciona riba e criticanan cu e ta bin hayando, no solamente di e fraccion di oposicion, sino di e mesun sindicatonan cu ta representa e trahadonan di enseñansa.

Lampe ta argumenta cu e mesun crisis di Covid-19 a ‘impone riba nos un realidad nobo.’ Y nos mester adapta na e normanan nobo, y nos sistema di enseñansa no ta un excepcion. Pues no ta e impon’e, sino cu realidad ta impone esaki riba nos.

 

 

LEAVE A REPLY

Please enter your comment!
Please enter your name here