Diahuebs atardi,Minister Maduro di Cultura, na un manera virtual, a hiba palabra durante e conferencia mundial di UNESCO riba maneho y desaroyo sostenibel di cultura Mondiacult 2022 teni na Mexico.
“Den nomber di gobierno di Aruba, mi ta felicita Mexico pa organisa y ta anfitrion di e evento importante aki”, Maduro a bisa den su discurso. “Wowo di mundo ta riba cultura y esey ta corecto, ya cu cultura tin e poder pa determina e desaroyo di humanidad.”
El a continua:
“Cultura ta entre otro e manifestacion di idea, intelecto humano y logronan creativo, comportamento social y custumbernan cu ta influencia grandemente door di educacion den tur forma y catalisa pa tecnologia y avancenan cientifico mundial. E eventonan global recien, manera e pandemia di Covid-19, desasternan natural y conflictonan geopolitico a mustra comunidadnan rond mundo e urgencia pa construi resiliencia y pone esfuersonan serio den nos ambicionnan pa cu desaroyo sostenible.”
Ademas, Maduro a bisa cu como cu Aruba ta un SIDS – un estado isla chikito den desaroyo – of un estado grandi den ocean, “dependiendo di bo opinion conceptual”, Aruba ta vulnerable.
“Na Aruba nos a scoge pa asumi nos retonan y enfoca riba e bentahanan cu cultura ta ofrece.”
Maduro a duna un bista di e esfuersonan di gobierno:
Ta tumando medidanan concreto pa trece educacion cultural den educacion formal y informal, como tambe den sociedad den su totalidad.
Mediante investigacion enfoca riba duna informacion riba e necesidadnan di artistanan y hende creativo, ta purba di usa instrumentonan efectivo y significativo pa sostene e sector creativo.
E preservacion di herencia documentario a mira un crecemento enorme den ultimo dos aña. Herencia documentario cu ta accesible na un audiencia amplio ta contribui na un discusion social tocante e pasado en relacion cu e futuro y por ta un fuente di inspiracion pa expresion creativo.
“Nos mester haci esfuersonan continuo pa mustra e importancia di un sociedad balansa unda cultura ta sosteni como un forma di educacion y desaroyo sostenible den nos propio manera di haci negoshi y e manera con nos ta biba. Pues e tempo ta corecto pa educa, preserva y stimula un maneho cu vision pa dilanti den cual cultura ta habilita innovacion, cambio di comportamento y crecemento economico”, maduro a finalisa.
