Diabierna dia 14 di juni tabata un dia sumamente importante pa Aruba y su futuro sostenibel. Manera cu a bay ta anuncia, desde cu a inicia e proceso pa logra yega na un miho maneho di desperdicio na Aruba (mas cu 1 aña pasa), gobierno a sa di informa y educa continuamente den forma transparente tocante locual ta tumando luga. Segun un comunicado di minister Otmar Oduber.
Meta
E sistema cu gobierno di Aruba a scoge yama capping den Ingles, cual ta un sistema cu ta enfoca riba baha e sero di dump di Parkietenbos mas tanto cu ta posibel.
E meta ta pa yega na un nivel cu ta responsabel (14-15 meter) como cu e punto di mas halto actualmente ta 25 meter! Intencion ta pa logra ‘tapa’ esaki di un forma cu den futuro hende no lo sa mes cu tabatin un dump na e sitio, al contrario, lo crea un alivio enorme pa henter e bisindario, aumentando calidad di aire den henter e bisindario. Esaki sigur ta trece alivio pa e habitantenan, teniendo na cuenta aspecto importante di salud y riesgonan cu e habitantenan a wordo exponi na dje durante hopi aña. Pues logrando e meta aki ta contribui na hisa e calidad di bida tambe di nos ciudadanonan.
Entrega di proposicion (proposal)
Te diabierna companianan cu proposicionnan pa proyecto tabatin chens pa entrega. Un resultado di destaho publico cu a conoce un compania local cu a entrega oferta pa remedia y elimina e dump na Parkietenbos. Notaris Johnson tabata e testigo pa habri e pakete y percura pa registra tur documento ricibi conforme principionan di bon maneho.
Proximamente lo tuma luga e fase di evaluacion pa mira si a base di e documentonan entrega, tin cumplimento cu tur rekisito stipula pa gobierno. Esaki di acuerdo cu e maneho cu gobierno ta hiba pa brinda miho proteccion na nos medio ambiente. Aplicando normanan internacional di maneho di desperdicio sostenibel y amical pa medio ambiente asina respetando derecho di ser humano.
Pa pais Aruba yega na e punto aki ta marca un paso hopi importante, pasobra cu e logro aki Aruba ta marcando un paso mas cerca di e meta pa cera e dump Parkietenbos, cabando cu tur e consecuencianan negativo pa medio ambiente y salud di e ser humano asina salvaguardiando e futuro di nos siguiente generacionnan.
