Minister Plenipotenciario Guillfred Besaril ta elabora riba e situacion fisico cu el a haya di Arubahuis, cual segun e ta den un situacion deplorabel.
Sr. Besaril ta bisa cu esaki ta un di e retonan grandi cu e lo trece dilanti den conseho di minister, pa asina busca un solucion mas pronto posibel pa Arubahuis.
E minister Plenipotenciario ta bisa cu el a haya un rapport cu ta recientemente traha pa un arkitecto particular na Hulanda. E ta bisa cu un investigacion extenso a wordo haci y cu tin diferente oficinanan cu tin schimmel. E mandatario ta bisa cu tin diferente situacion cu realmente no mester ta asina.
Minister Plenipotenciario ta bisa cu e tapijt riba e prome piso di Arubahuis tin mas di dies aña y esun riba di dos piso mas di 15 aña cu esakinan no a wordo cambia. Sr. Besaril ta sigui bisa cu bo por mira cu e mueble nan di e Betico Zaal ta practicamente di tempo cu Arubahuis a muda, na 1987-1989. E ta mira tambe cu diferente di e kozijnnan cu a cuminsa putri. Locual ta trata e parti paden di Arubahuis mester di atencion inmediatamente.
Sr. Besaril ta bisa no mester lubida cu Arubahuis ta cara di Aruba den exterior. Arubahuis ta ricibi bishita di mandatarionan y hasta directornan halto cu lo bo kier trece Aruba pa e desaroyo economico di nos pais. E mandatario ta sigui bisa cu y no ta husto pa nan bin topa cu e edificio den un situacion deplorabel asina .
