‘Minister presidente no a duna parlamento informacion riba situacion cu Venezuela’

Parlamentario Marlon Sneek (AVP)

Lider di fraccion di AVP, Marlon Sneek a confirma cu ainda minister presidente Evelyn Wever Croes, no a bin parlamento pa duna informacion di e desaroyonan cu tin riba e situacion cu Venezuela.

Sr Sneek a mustra cu mientras cu na Corsou y Bonaire, tambe den Eerste y Tweede Kamer tur hende a wordo informa riba e reunionnan cu a tuma luga algun siman atras, aki na Aruba prome minister no ta duna respet na Parlamento cu su persona mes a bisa, cu porfin lo tin respet pa e institucion aki.

“Nos por a mira publicacion den corantnan Venezolano caminda presidente di Parlamento, Ady Thijssen lo a negocia cu mandatarionan di e pais ey, y a papia di un zona comercial na Paraguana. E articulo a mustra bon cla cu contenido y resultado di e reunion aki lo wordo pasa pa minister presidente Wever Croes pero na Parlamento mes nada ta conoci di contenido di e negociacion aki. Mientras tanto tin otro mas informe den exterior cu ta contradeci declaracionnan duna pa premier Wever Croes y despues cu aki na Aruba tur hende sa cu e lider di MEP ta gaña,awor te hasta den exterior nan a haya sa di esaki. Fraccion di AVP a dirigi un carta na prome minister pa e bin parlamento pa duna informacion riba tur loke ta tumando luga pero nos por mira cu e ta keiro tur caminda, bishitando centronan pa e sigui haci politica mescos cu campaña ainda ta continua pero no tin tempo pa bin parlamento pa informa representantenan di pueblo riba tur loke ta pasando. Un situacion cu nos ta desaproba totalmente ya cu ta mesun minister presidente aki pa añanan largo, a papia di respet pa Parlamento, cu su gobierno si ta bay ta transparente y tur cos pero no kier bin parlamento pa duna informacion concreto riba tur locual ta pasando.

Na mes momento tur hende por tuma nota cu ainda no tin solucion pa e embargo impone pa gobierno Venezolano pero aki un biaha mas por mira cu e falta di conocemento di diplomacia, e falta di ta bon informa di tur loke ta pasando, ta pone cu gobierno no por haci mucho den e conflicto aki, apesar cu minister presidente a yega di bisa cu tur porta rond mundo ta habri pa su persona”, parlamentario Marlon Sneek a mustra.

You May Also Like

Introduccion di Good Governance, un condicion pa pone nos hobennan profesional kere den Aruba atrobe

Patronahe politico, mal gobernacion y corrupcion tin su consecuencianan desvastador pa henter un pais. ...

MEP: E campaña di manipulacion di AVP ta sigui

Awor cu e fecha di eleccion di 22 di September ta acercando por mira ...

Otmar su critica na AVP ta manera e burico ta yama e porco pa horea di para taxi

Informacionnan confidencial cu gobierno no kier divulga, normalmente ta yega den nos “brievenbus” particular. ...

Lopez-Tromp y Bikker ta pidi reunion publico urgente referente Paul Croes

Parlamentario Marisol Lopez-Tromp a haci entrega di un peticion na Presidente di Parlamento, sra. ...