“E tabata un bon reunion,” asina minister di finansa y economia, Xiomara Ruiz-Maduro a cualifica e reunion cu a sostene recientemente, cu representantenan di Sindicato di Cuerpo di Duana Aruba (SADA).

De e reunion aki e mandatario por scucha sin mayor tension e preocupacion di e miembronan di SADA. Nan a trece dilanti un lista basta largo pa atende cu nan. Ruiz-Maduro a bisa cu nan lo atende cu cada un di nan den e tempo cu a wordo duna.

Un punto principal cu SADA a trece dilanti tin di haber cu structura salarial. E mandatario a sigura cu e trabou aki ta wordo haci na e momentonan aki, y pa trece trankilidad cerca SADA, e mandatario a splica nan unda esaki ta den e proceso gubernamental cu mester pasa.

“Ma splica nan y mi a duna nan un actualisacion di esaki (red: structura salarial) pa nan por duna na nan miembronan tambe,”el a bisa.

Nan a reuni y trata algun puntonan pero –segun e minister en cuestion– nan no a logra caba cu tur, pasobra e lista ta extenso. Ya caba nan tin programa otro reunion dia 2 di juli pa sigui papia riba e puntonan di preocupacion di e miembronan di SADA.

E ta haya cu di parti di SADA y di parti di dje como mandatario encarga cu departamento di duana, e reunion ultimo a bay bon. Nan por papia trankil pa pasa kico ta preocupa e duaneronan. Tambe e Ruiz-Maduro a laga sa cu a tuma nota di loke a wordo trece dilanti pa e por haci su otro ‘accionnan’, esaki a base di e informacionnan cu SADA a brinda na dje. Pero di otro banda e mandatario a probecha e clima faborabel aki pa pidi SADA cooperacion tambe ariba cierto puntonan.

E ta haya cu e tension cu tabata relaciona cu cos cu a yega di sosode for di inicio di e gobernacion aki. E no a caba di sinta como minister, y SADA a bin cu un strike y cana bin te na Bestuurskantoor cu documento. Y asina a bin otro echonan, cu te hasta mester bay hues; y tur esaki a trece friccion entre ambos parti. Y aunke nan a yega di reuni caba, e ultimo reunion a bay den un bon ambiente.

E ta haya cu hopi biaha e friccion ta resulta na momento cu e informacion no ta corecto of no a yega di e forma corecto cu mester a yega. Esaki ta algo cu nan a atende cune, pero e reunion aki no a caba ainda y otro luna lo sigui cu e preocupacionnan.

 

LEAVE A REPLY

Please enter your comment!
Please enter your name here