“Maneho ta wordo traha den pueblo y cu pueblo. Nos ta akinan pa purba hunto yega na un maneho, y naturalmente e leynan pa sostene esaki, na un manera sostenibel, responsabel y den dialogo a base di un vision unda naturalesa lo ser considera como partner igual den nos comunidad.” Asina minister di naturalesa, Sr. Ursell Arends a habri un reunion diabierna anochi na Centro di Bario Playa Pabao hunto cu un grupo grandi di piscadornan. Aki a trata specificamente e tema di Spearfishing.

Actualmente segun ley, Spearfishing no ta permiti. Esaki ta tumando luga solamente por medio di un gedoogbeleid cual ta permiti personanan den posesion di un permiso pa eherce e actividad, pero bao di reglanan hopi estrecho – y segun e piscadornan, peligroso tambe.

Despues di deliberacion cu e departamentonan concerni y stakeholders den e veld di Spearfishing, minister Arends a tuma e decision cu lo kier bay regula e actividad por medio di ley, en bes di prohibi e actividad.

Segun minister Arends, tin oportunidadnan pa uza e conocemento y experiencia di e piscadornan aki na bentaha di proteccion di naturalesa, y tambe pa e coleccion di data necesario pa midi cierto impactonan – negativo of positivo – di maneho y regulacion riba nos bida marino y calidad di awa di nos lama.

Hunto cu tur e departamentonan concerni, Minister Arends y su team a scucha y dialoga cu e spearfishers nan unda nan a trece nan ponencianan y preocupacionnan dilanti pa asina gobierno na su turno, tene esakinan den consideracion den e maneho di Spearfishing.

Minister Arends lo continua cu e discusionnan hunto cu un grupo di representante apunta door di e piscadornan, asina por continua colaboracion pa yega na un maneho cu ambos piscadornan y ambientalistanan por biba cune.

Un palabra di gradicimento ta bay na tur cu tabata presente y pa participa na trece puntonan y experiencia riba e tema aki dilanti.