Memey di tur e turbulencia, Gobierno a logra cumpli cu e ‘debt service’ pa Pais Aruba pa aña 2020.

Segun e siguiente comunicado di prensa, na maart a logra cera e prome transaccion di 36 miyon dollar y na juni ta logra un transaccion di 253 miyon dollar. A pesar cu e crisis ta afecta Aruba su credibilidad financiero, inversionistanan ta keda kere den Aruba. Banconan grandi manera Credit Suisse, FCIB y CIBC a keda cu confiansa den Aruba. Cu e transaccionnan aki Aruba a manda un señal positivo na e mundo financiero cu Standard and Poor’s, Credit Suisse, FCIB y CIBC tin tur confiansa cu e hendenan di Aruba tin e capacidad pa mobilisa y e fortaleza moral pa cumpli cu nan responsabilidad financiero hasta den momento di crisis. Inversionistanan a mustra cu Aruba ta un Pais solido pa nan inversion.

Ta bon pa informa cu Reino Hulandes ta yuda Aruba cu sosten di likides y fondo pa subsidio di salario, pero a indica explicitamente cu Aruba mes ta keda e prome responsabel pa atende cu e mega debe di nos Pais. E aña aki Aruba mester paga 583 miyon florin riba e debenan existente di nos Pais. Na momento cu e crisis di COVID19 a manifesta na Aruba, Gobierno tabata memey di e trabounan necesario pa subi mercado internacional pa busca e fondonan pa cubri e necesidad financiero di Aruba pa aña 2020.

Aruba tabata someti na un evaluacion financiero y economico pa companianan di rating Fitch y Standard and Poor’s, cu a resulta den un ‘downgrade’ door di Fitch y un resultado positivo di ‘investment grade’ door di Standard and Poor’s. E ultimo aki a yuda pa Aruba por a keda conta cu e confiansa di inversionistanan y asina logra cera e dos transaccionnan necesario na un interes cu a aumenta solamente cu 0,5% y a keda na 5%.

Maduro ta gradici henter e ekipo di Aruba y na Merca cu a traha duro pa haci e transaccionnan aki posibel pa nos Pais. Danki pa e confiansa den Aruba tambe den tempo di crisis, segun e comunicado ta finalisa.

LEAVE A REPLY

Please enter your comment!
Please enter your name here