Home Local Minister Xiomara Ruiz-Maduro: ‘Tin mal informacion tocante fiansanan di gobierno riba mercado...

Minister Xiomara Ruiz-Maduro: ‘Tin mal informacion tocante fiansanan di gobierno riba mercado internacional’

533

Ministro di financia, asuntonan economico y cultura, Xiomara Ruiz-maduro (MEP) a tuma nota di un publicacion riba un pagina social di un media local, referiendo na e fiansa di gobierno di Aruba riba mercado internacional.

E publicacion riba ret social ta trece dilanti cu e interes ta na 6.5%, cual ta mas halto cu interes pa hipoteca pa un cas.

Segun e comunicado cu Bon Dia a ricibi di gobierno, den e articulo ta insinua cu e interes pa e fiansa haci pa e mandatario di financia, ta 2% mas halto cu interes cu e gobierno anterior a fia algun aña pasa. Mirando e hecho cu e publicacion aki ta carece di berdad, ministro Ruiz- Maduro ta asumi su ‘responsabilidad’ pa coregi e informacion incorecto aki.

“Realidad ta cu ya pa mas di un decada e fiansanan di gobierno di Aruba riba mercado internacional tin interes mas halto compara cu fiansanan local. E interes riba fiansanan internacional ta mas halto cu e interes riba un hipoteca di cas. Esaki no ta nada nobo y politiconan di oposicion, sigur esunnan cu tabata consehero of ex minister, mester por sa esaki masha bon.”

Den e grafico adhunto por mira cu desde 2009, gobierno di Aruba ta paga un ‘averahe di 6.5% na interes riba fiansa internacional’. “Na 2014 ainda gobierno di AVP a cera tres prestamo internacional riba cual awe nos ta paga mas cu 7% na interes pa aña, debi cu e gobierno di AVP no a fia na interesnan fiho”, e minister ta sigui splica.

E ta ‘lamentabel’ cu despues cu esunnan di oposicion a traha un debe asina grandi pa Aruba, awe ainda nan kier presta nan mes, scondi tras di saya di un periodista, pa ‘mal informa pueblo’, segun e minister.

“Lo ta miho pa uza e conocemento adkiri como consehero y ex minister di nos pais, pa contribui positivamente na bienestar di Aruba y no sigui den e mesun caminda di manipulacion y engaño.”

Di su parti, minister Ruiz-Maduro, como ‘mandatario responsabel y serio’ ta hibando un ‘maneho transparente’ y esaki ta contribui cu awe Aruba ta ganando e confiansa bek cerca e institutonan financiero internacional, e comunicado a clausura.