Home Local Studiantenan mal contento cu opvang na Hulanda

Studiantenan mal contento cu opvang na Hulanda

1636

Recientemente, un studiante recien yega na Hulanda a acerca Bon Dia Aruba pa splica e mal contento cu e opvang cu nan a haya na Hulanda ora nan a yega. Segun e studiante, cu ta prefera di no wordo nombra, hopi cos dudoso a tuma luga.

E studiante ta subraya cu nan a yega Hulanda 11or di mainta orario di Hulanda y a e opvang commissie tabata tin plan caba di hiba nan Scheveningen atardi siendo cu nan tabata jetlagged di e vuelo largo. Sinembargo, e studiante ta remarca cu no ta tur leidster di opvang commissie a haci un mal trabao. Mas tanto tabata e organisacion di e schedule cu tabata mal hinca den otro. Esaki ta un studiante cu despues di a mira e poco colaboracion na Utrecht, a dicidi di kies Den Haag como su ciudad di estudio.

Hotel Ibis
E studiante a comenta na Bon Dia Aruba, cu e opvang commissie a regel un solo anochi pa nan na un hotel y despues e studiantenan mester a den un forma di bisa ‘zoek het maar uit’.

Segun e hoben niun caminda den e schedule tabata poni cu e hotel lo ta pa un anochi so, ni ki ora nan ta check out tampoco. Hopi ta esunnan cu no tabata tin luga di bay y a keda extra anochi na e hotel y locual e mentor a haci tabata purba di haya un miho prijs pa anochi pa nan. Asina mes, nan a baha e prijs cu 10 euro so. Pues e studiantenan a keda paga entre un 50 a 60 euro pa anochi.

“Ami con cu bay bin a conta cu amigonan cu ta na Hulanda caba y hende cu por guiami haya un caminda di biba. Pero ta hopi ta esunnan cu ta completamente nan so y no tin caminda di bay. Nan a priminti cu nos lo bay diferente makelaar pa yuda busca cas, pero nos a bay un so. Unda tabata tin un Arubiano ta traha. Eynan tabata tin demandanan di dos luna di borg y placa pa contract. Mi a wak yen studiante ta firma cos y mi no ta ni comprende dicon. E makelaar cu nos a bay tabata bisa caba cu chens di haya un camber tabata bou 30%. Ora studiantenan di Curacao yega, niun ta sin cas pasobra nan leidsternan cu mentor ta zorg pa nan cada un haya un camber. Pero cu studiantenan di Aruba tin problema. Hopi luganan ta cuminsa huur per 1 oktober of per 1 november, pero den tur e transurso di luna nan ey unda nos tin cu keda?” E studiante ta comenta.

Arubahuis
E hoben ta conta cu e no kier causa problema, pero cu e no ta comprende kico Arubahuis precisamente ta haciendo pa locual ta trata e studiantenan na Hulanda.

E ta conta Bon Dia cu e no kier cosnan aki pasa otro aña cu studiantenan atrobe. Tambe placa a wordo tuma di nan lening pa nan tur por haya un carchi di transporte cu ne cu placa riba dje, pero esaki no a sosode tampoco. E hobennan mester a haci un scavenger hunt den ciudad cu tabata tin nan ta bula di tram pa tram y tur esaki ta costa e studiante placa tambe.

“Un di e hobennan tabata contami cu e tabata desespera pasobra e ta kedando den hotel y e no ta haya caminda pa biba. Nan ta keda scam studiante, un studiante no mester pakico pasa un agencia pa haya un kamber si tin mas opcion. E servicio di un real estate agent ta hopi caro. Nan mester di guia, pasobra nan ta eynan sin un bon support system. Claro cu algun leidster ta haci nan best, pero aworaki e no ta suficiente”, e studiante ta finalisa.