Ayera mainta caso IBIS a continua den Corte di Apelacion na unda cu a sigui trata e parti di malversacion di fondonan di e fundacion di ex-minister Paul Croes ‘Leadership in Excellence’ cu tabata destina specificamente pa metanan politico y cu a wordo usa pa paga cosnan personal.

Den e gastonan di e fundacion tabatin e pago di studielening (DUO) di Croes, joyasnan, brilnan, airco pa su cas, materialnan di construccion pa su cas y pagonan personal di su credit card.

Loke a hala atencion ayera den e corte ta cu Croes a declara dilanti di e tres magistrado cu su studielening a wordo paga cu e placa di hipoteca di su cas, esey ta nifica cu segun el a sigura el a re-hipoteca su cas, lanta e placa cash y deposit’e riba e cuenta di e fundacion, via di e fundacion el a paga su studielening.

E magistrado a puntr’e pakico e no a paga e hipoteca directo for di su cuenta bancario, na final Croes no por a duna un contesta concreto.

Tambe a bin dilanti cu magistrado a puntra Croes aproximadamente 3 biaha, kico diamante tin di haber cu e metanan politico cu supuestamente su fundacion tabatin, na unda a keda conoci cu el a paga via su fundacion e cifra di 5.000 florin na diamante. Den esaki, tampoco Croes por a contesta.

Tocante e sumanan cu e fundacion a deposita riba Croes su credit card personal, el a trece un cantidad di recibo pa purba hustifica e deposito riba su credit card na unda cu el a menciona e palabra “voorschot”, e tabata haci gastonan cu su credit card personal como por ehemplo, come den restaurantnan cu “metanan politico” y e fundacion tabata pag’e back.

Un di e magistrado a puntra Croes con e por prueba si e bishita na restaurantnan aki tabatin metanan politico of personal, akinan tampoco Croes no por a contesta.

Ademas, casa di Croes , Melony Paesch tambe mester a duna cuenta ayera mainta riba diferente acusacion cu tin contra dje, cu ta complice di duna empleo ilegal (medeplegen van ilegale tewerkstelling) y complice di labamento di placa (medeplegen van witwassen).

Paesch a splica e magistradonan tocante e persona cu tabata traha pa famia Croes como babysitter, na unda cu a keda conoci cu tabata un persona stranhero cu a keda deteni 28 di maart di 2017 ora Ministerio Publico a haci un entrada hudicial den cas di Croes, den esaki, e persona no por a demostra su documentonan di estadia legal na Aruba.

El a declara cu e no tabatin confiansa pa laga su dos yiu cu cualkier persona y na mesun momento el a purba entre su amistadnan y publica riba rednan social pa haya un babysitter pero e no a logra. Di otro banda tambe el a bisa cu na Aruba ningun Arubiano ta haci e trabou di babysitter.

Pa e motibonan aki, el a dicidi di busca un persona na Venezuela pa wak pa su yiunan, alabes el a pidi magistrado disculpa cu el a tuma e decision aki.

Ayera Procurador General den su requisitor a pidi castigo pa e sospechoso Jairo Wever 5.000 florin (mita condicional) y dos aña di prueba.

Pa Robio Di Vecchia dos siman di castigo condicional of tres aña di prueba.

Pa Ninosca Nuñez 240 ora di trabou comunitario, 120 dia di castigo di prizon y 3 aña di prueba.

Pa Paul Croes, Procurador General a pidi 4 aña di prizon y 9 aña sin por eherce un funcion politico.

Pa Melony Paesh a pidi 120 ora di trabou comunitario, 16 dia di prizon, 3 luna di prizon condicional, ademas di 3 aña di prueba.

Pa Rudmilla Yvonne Martinus Procurador General a pidi absolucion (vrijspraak).