Ayera, Ministerio Publico a manda na tur medio di comunicacion un reaccion pa loke ta trata e keho penal cu miembronan di Parlamento Arthur Dowers y Mike de Meza a entrega dia 17 di januari ultimo contra ex-Minister planipotenciario Guillferd Besaril.
Den un carta entrega na Ministerio Publico, a bin dilanti e pregunta si Prome Minister di Aruba Evelyn Wever-Croes a haci denuncia relaciona cu supuesto iregularidadnan na Arubahuis. Den nan carta a mustra tambe riba e overbruggingstoelage di cual e minister plenipotenciario anterior aparentemente ta haci uso, y a tilda e prome minister di abuso di poder, segun e comunicado ta indica.
Ministerio Publico a reacciona riba e carta ayera mainta y a confirma cu Prome Minister a haci denuncia relaciona cu iregularidadnan na Arubahuis y pa loke ta e overbruggingstoelage y e supuesto abuso di poder, Ministerio Publico a referi na e areglo legal cu tin.
En conexion cu e atencion di parti di media cu tabatin diamars ultimo, Ministerio Publico a dicidi pa publica e reaccion aki riba e dos parlamentario di partido AVP, Arthur Dowers y Mike De Meza.
Den un entrevista na un otro medio di comunicacion diamars ultimo, Dowers a indica cu for di luna di mei di 2021, Prome Minister Evelyn Wever Croes a wordo informa di e caso di Minister Besaril y el a confirma despues cu tin un investigacion andando y cu el a ricibi informacion di persona di Arubahuis riba decisionnan ilegal cu Besaril a tuma.
“Loke ta bisto den henter e caso aki, Prome Minister Evelyn simplemente no kier entrega keho contra ex-Minister Besaril y te ainda no ta sigur cu el a presenta resultado di e investigacion di CAD na Ministerio Publico pa inicia c’un procedura penal y cu Prome Minister e tempo ey tabata na haltura di e bagamunderia cu Besaril tabata cometiendo den su posicion di Minister plenipotenciario, caminda el a haci mal uso di fondonan di Arubahuis.”
El a compara e situacion cu a tuma luga na aña 2021 ora na e tempo ey, Parlamentario Alan Howell a bira sospechoso den un caso penal y Prome Minister a dicidi di entrega retiro. Howell, ken prome tabata fungi como polis no por a bay bek na su trabou debi cu a wordo suspendi, pero Besaril si ta keda den su funcion igualmente como polis y ta sigui cobra “overbruggingstoelage”, manera Prome Minister a sigura den un conferencia di prensa na october di aña pasa.
Nan ta cuestiona e hecho cu “te dia di awe ainda Prome Minister no a entrega e caso na Ministerio Publico pa wordo investiga legalmente y aki nos ta papia di cosnan serio, acusacionnan cu Ministerio Publico a bin ta uzando pa investiga y persigui otro politiconan cu no ta di MEP. For di e rapport di CAD cu a investiga e caso di Besaril, no por mira acusacionnan serio manera ‘verduistering in dienstbetrekking, valsheid in geschrifte en oplichting’ y tambe ‘witwassen’, acusacionnan cu Ministerio Publico a yega di usa contra otro politiconan sin prueba concreto pa persigui e politiconan aki.” el a sigura.
