Ministerio Publico a confirma na Bon Dia Aruba cu nunca nan a haya un aangifte den e caso di estafa miyonario na Setar y cu ainda no a haya uno tampoco.
Manera cu nos a informa, den un rueda di prensa siman pasa di gobierno y Setar, a wordo declara cu organonan hudicial a conseha pa no entrega keho tanten cu no tin suficiente informacion y prueba. Bon Dia Aruba a acudi na Ann Angela, vocero di Ministerio Publico pa puntra si ta berdad cu husticia a conseha e compania di telecom y gobierno pa warda cu nan denuncia y haci un investigacion interno prome. “Nos no kier bisa nada tocante kico a wordo papia of no.” Bon Dia Aruba a puntra tambe si Ministerio Publico lo bay tuma accion riba nan mes of si lo warda pa denuncia wordo entrega door di gobierno of Setar. “Nos ta warda,” sra. Angela ta informa.
Investigacion forensico
Manera cu nos a informa caba, durante un rueda di prensa siman pasa di gobierno cu directiva di Setar, a informa cu un investigacion forensico mester a wordo haci prome cu entrega keho na Aruba. Segun minister Mike de Meza: “Locual a tuma luga, no a tuma luga dentro di Setar. Ta cosnan cu a tuma luga indirectamente via companianan di exterior. Indicacionnan ta hopi cla cu esaki no tin nada di haber cu director di Setar of otronan den Setar. E persona specifico tabata haciendo e practicanan aki na un manera sumamente dificil pa detecta”, minister De Meza tambe ta bisa. Bon Dia Aruba lo sigui e desaroyo di e tema aki como tambe tumando contacto cu otro gremionan di husticia concerni.
