Nicolas Maduro ta soborna islanan di Caribe cu petroleo

Desde aña 2000 ex-presidente di Venezuela Hugo Chavez a cuminsa cu un politica exterior, cu algun experto a yama “diplomacia petrolero”. E convenio tabata posibel pa motibo di prijs halto cu petroleo tabatin den pasado, un situacion hopi diferente compara cu awor. Venezuela  tabata bende petroleo na pais cu necesidad bao condicion hopi faborabel y a cambio Venezuela tabata spera apoyo di e paisnan ey den foro internacional.

Den e situacion aki Venezuela a crea PetroCaribe na final di aña 2004.  E sistema di PetroCaribe tabata pa crea un mecanismo di compra y benta di petroleo entre Venezuela y mayoria di pais di Centro America y Caribe: Antigua y Barbuda, Bahamas, Belice, Cuba, Dominica, El Salvador, Guatemala, Guyana, Granada, Haiti, Honduras, Jamaica, Nicaragua, Republica Dominicana, San Christopher, Nevis, St. Vincent & Grenadines, St. Lucia y Surinam.

Den ultimo añanan e aliansa aki a debilita poco poco, pa motibo cu prijs di petroleo a baha y asina  e empresa Venezolano di petroleo a baha su produccion. José Guerra, economista, a bisa cu “ e entrega di petroleo cu ta pertenece na e convenio di cooperacion energetico cu PetroCaribe, a cay di 150.000 pa 80.000 bari pa dia.

E situacion aki por ta un motibo cu a haci cu algun pais a  kibra e pacto di apoyo cu Venezuela, siman cu a pasa na OEA, ora cu 18 pais a pidi na presidencia di conseho permanente OEA, un sesion extraordinario pa discuti e crisis democratico actual na Venezuela. Entre e paisnan di Caribe cu a firma tin Bahamas, St. Lucia y Jamaica.

Si e 18 paisnan cu a firma na prome momento por keda di  acuerdo, anto OEA por aplica e carta democratico interamericano y asina suspende Venezuela for di e organismo di estado Americano.

nicolas-maduro.jpg
Pesey gobierno di Maduro ta pone presion na ultimo ora riba su tres socionan comercial cu a bira lomba den OEA,  pa nan no bay hunto cu Luis Almagro, secretario general di OEA, ora cu dicidi pa yama un votacion y asina busca e posibel ehecucion di e carta democratico interamericano.

“Convenio di PetroCaribe no ta na interes nacional di Venezuela. E convenio ta apoya un grupo politico cu ta usa tur recurso petrolero pa nan propio beneficio, mientras cu ta falta respet  na separacion di poder publico y ta mantene preso politico den prizon,” Orlando Ochoa, economista, a splica.

Ochoa a splica cu e volumen di petroleo cu Venezuela tabata manda pa cada isla tabata entre 5000 y 6000 bari pa dia. Venezuela tabata bende  petroleo bao di condicion hopi facil y cu basta bentaha, pasobra a traha contrato di 10,15 y 20 aña di duracion cu un interes cerca di 2% pa aña.

Ochoa a sigura cu PetroCaribe a costa  Venezuela cerca di 10.000 miyon dollar desde 2007.

 

You May Also Like

Panama no lo solicita visa pa pasaheronan Venezolano di transito

E vice-canciyer di Panama, Luis Miguel Hincapié, a bisa cu tur Venezolano cu lo ...

Mas denuncia di tortura entrega na Corte Penal Internacional na Den Haag

E instituto CASLA, un organisacion Checo cu ta vigila violacion di derecho humano, a ...

IMF: Hiperinflacion na Venezuela lo bira mas fuerte

Fondo Monetario Internacional (IMF) a declara ayera cu e hiperinflacion na Venezuela por ta ...

Region Valle del Cauca tin mas di 3500 muhe afecta pa cirugia plastico mal haci

Cirugia plastico mal haci no ta stop di causa alarma na Colombia. Segun Secretaria ...

Enseñansa secundario Argentino den crisis mayor

Den caida liber y acumulando fracaso, e scol secundario Argentino ta duna indicacion cu ...