Otro siman lo tin un grupo di tirado di pisca cu un decreto ministerial den man y por pisca cu harpun sin ningun miedo cu autoridadnan lo kita e arma for di nan. Nan ta entre e 74 persona caba cu a registra pa haya un decreto ministerial pa asina cuminza tira pisca. Esey ta locual Minister di Sector Primario Cris Romero a splica ayera. E decreto ta mara na condicionnan cu mester tene bon cuenta cu nan, pa asina no perde henter e lucha cu a hiba pa logra e gedoogbeleid.

E registro ta sosode pa medio di e pagina di Facebook di Santa Rosa y tambe riba e website di e departamento di Agricultura, Cria y Pesca. “Awe mi tin bon noticia pa trece pa spearfishers. Algun siman pasa mi a trece dilanti pa con por yega na un decreto ministerial pa permiti tiramento di pisca, cu ta mara na proceduranan. Pero awor mi kier trece puntonan mas concreto.”

Procedura

Romero a bisa cu e ta hopi contento cu e reaccion di piscadonan. Ta spera di lo yega rond di 100 peticion. E procedura ta cu ta yena e formulario, cu despues ta bay pa Minister Romero pa medio di Bureau Interne Diensten (BID), hunto cu e conseho cu Santa Rosa ta manda p’e. Santa Rosa ta tuma contacto cu e persona cu a yena e formulario y ta repasa tur e rekesitonan cu e piscado. Unabez completa e proceso, Santa Rosa ta manda e conseho pa Minister. “Santa Rosa lo haci e trabou necesario. Y si mester, ta duna conseho negativo tambe. Unabez cu e conseho positivo drenta, mi ta firma e decreto ministerial.” Pero e trayectoria pa e piscado no a caba eynan, pasobra unabez cu e decreto den su man, e mester bolbe Santa Rosa hunto cu e dos spearguns maximo cu ta permiti, unda lo saca potret di e ekiponan aki, ta duna nan un number di registracion. “Asina lo por identifica ken ta esnan cu a haya registracion y di e forma ey por controla miho.”

No lo tin ‘free for all’

Minister Romero a sigura cu a percura cu no ta bay bin un ‘free for all.’ Al contrario, e tirado di pisca lo mester cumpli cu un cantidad di condicion. Entre otro, mester tin un bouy na tur momento pa siguridad personal, di forma cu botonan por sa cu tin un persona bou awa ta pisca. E Minister a enfatisa cu no ta sin mas por yega tira pisca, sin tuma e precaucionnan pa siguridad.

Pero, banda cu ta registra e arma, mester firma un contrato tambe. E contrato aki ta mara e tirado di pisca na e condicionnan stricto, y cu den caso cu no cumpli cu e rekesitonan, nan lo perde e derecho pa tira pisca. “No ta algo nobo. Lo mantene e leynan existente. Nos no mester a haci nada adicionalmente,” Romero a bisa. “Unabez cu e piscado ricibi su decreto y tin su arma registra y a firma e contrato, e sa cu si e no cumpli cu exigencianan, cu e lo perde su derechonan di immediato.”

Respeta medio ambiente

E procedura segun Minister Romero ta bon. Mester respeta medio ambiente di Aruba y percura cu esaki ta cana bon, pa no bin algo cu ta crea obstaculo pa e lucha di hopi aña. Por ehempel, tin zonanan pa tira pisca. Piscadonan lo ricibi un mapa, hunto cu nan decreto y registro. Ainda e mapa final no ta cla, pero en todo caso e ta exclui areanan specifico unda no por tira pisca. E Parke Marino lo ta respeta, mescos cu e areanan di cay (rif). “E Parke Marino no tey pa stroba ningun hende, sino pa duna mas structura na nos awanan teritorial.”

Tiradonan di pisca lo por haci uzo di nan derecho na e banda panort y pariba di Aruba. “Absolutamente no ta permiti pa yega cerca di coralnan. Ta den coralnan tin e piscanan cu ta protehi. Absolutamente lo no tira den coralnan.” Y aparte di e zonanan, tiradonan di pisca mester respeta e especienan cu ta protehi.
Romero a bisa cu ta e especienan cu ta describi den e landsbesluit Flora y Fauna. Nan ta por ehempel ta Gutu, cu ta traha e santo blanco, e Tortuga, e Chuchu (Manta) cu ta protehi, y tambe especienan di tribon, Hammerhead Shark. “Unabez un persona ricibi su decreto, e ta compromete cu e ta respeta e leynan di Flora y Fauna,” Romero a enfatisa.

Consequentemente, banda di e mapa di zonanan lo pone e nombernan di e piscanan protehi. Bon Dia Aruba sa di e trabou cu biologo marino Byron Boekhoudt a haci pa pone e imagennan di e piscanan protehi, hunto cu nan nomber local. Pues e produccion aki ta traha caba.

One strike you’re out

Consequencianan si no cumpli cu e condicionnan di e decreto ta severo, segun Cris Romero. Si mester haya un piscado ta kibra un di e reglanan aki, por ehempel cu a tira un pisca protehi, e lo perde e decreto ministerial. Tambe lo perde e decreto si ta hay’e ta pisca den e zonanan prohibi. “Si bo no ta cumpli cu rekesitonan den e decreto, bo ta perd’e. One strike your out. Lo no tin chens extra.” No a determina ainda pa cuanto tempo lo perde e posibilidad pa tira pisca, pero e por ta un periodo di algun aña.

Motibo pakico mester kier pa tiradonan di pisca ta cumpli strictamente cu e areglo ta pasobra no sin mas por a logra e gedoogbeleid. “Esaki ta un lucha di hopi aña. Ta for di 2005, diferente Gobierno a lucha pa bin cu un tipo di maneho. Pesey laga mi gradici Minister Andin Bikker, kende sigur pa añanan a bringa pa logra , el a bringa te na Hulanda.” (red. Andin Bikker a perde su caso na Hoge Raad cu a bisa cu piscamento cu harpun ta contra tratadonan y protocolnan cu Aruba a ratifica). Romero a sigui bisa cu e dos Ministernan a sinta den Parlamento pa mira con nos por logra cu por permiti tiramento di pisca atrobe. “Tambe mi kier gradici esnan den Ministerraad y Minister Presidente cu a sostene nos semper. E la bisa nos si, cu nos mester zorg pa nada cay bek riba nos. Nos ta hayando oportunidad awor. Nos ta pidi cooperacion di piscadonan tambe, pa duna boso banda. Nos a duna nos banda y awor ta boso mester cumpli cu tur e condicionnan pa despues no punta dede na ningun di nos. Pasobra nos tur a hiba un lucha pa esaki y awor nos ta na un punto cu e ta bira un realidad.”

Pa otro siman pues lo tin e prome piscadonan cu ta bay haci uzo di spearguns basa riba un decreto ministerial sin cu nan mester ta preocupa cu autoridadnan hudicial lo kita nan harpun for di nan, basta cu nan cumpli cu tur exigencia den e decreto ministerial.

Control

E instancia pa controla cu piscadonan ta mantene nan mes na e condicionnan lo ta Kustwacht y polis maritimo. Segun Minister di Husticia Andin Bikker ya a informa tanto Kustwacht y Ministerio Publico di e decision y mescos cu e piscadonan, Kustwacht lo haya e mapa unda ta permiti tiramento di pisca, y unda no ta permiti.

E maneho di tolerancia tabata un solucion pa Andin Bikker y Cris Romero, pa cumpli cu demanda di un grupo di tirado di pisca cu tin hopi tempo ta lucha pa por practica e forma di pisca aki. “Un maneho di tolerancia, un gedoogbeleid no ta algo cu nos a inventa. Un nota di 1996 di Tweede Kamer di Hulanda, anticipando un cambio di ley.” E Minister a bisa cu unabez e ley keda adapta (Visserijverordening) lo introduci un sistema di permiso (vergunning) pa por sigui cu tiramento di pisca.

“Nos a informa e departamentonan di mantencion di ordo cu nan mester tene cuenta cu e maneho nobo. Pero nos ta urgi tur esnan cu ta bay tira pisca, pa aprecia e lucha aki. E ta algo pa respeta y mester observa e reglanan. Si no ta observa y no sigui e rekesitonan, bo lo no tin e decreto.” Minister Bikker a splica cu e ta similar si tin un pas pa drenta un parti di un edificio. Si haya un persona den un zona prohibi, ta considera cu e no tin e pas y ta perde entrada. “Esunnan cu ta bay haci bon uzo di dje, por pisca cu e tipo di artefacto aki. Y si no cumpli, lo aplica e leynan,” e Minister a adverti.

En todo caso e tambe ta contento cu por fin a yega na fin di un lucha di hopi aña y asina a cumpli tambe cu e mocion cu Parlamento a sostene den forma unanime. “Awor nos a drenta un era nobo cu ta un balance entre medio ambiente y piscadonan.”