Ministro cu medida na DIP/DOW

Y ta revela detaye di e practica coruptivo

For di entrevista den prensa nos ta comprende cu e ministro nobo encarga cu Infrastructura y Medio Ambiente no ta vacila pa cuminsa coregi e desastre grandi cu tabata tuma luga den e departamentonan aki. Pa cuminsa el a bay atende asunto di e departamento encarga cu emision di tereno publico den erfpacht. Di su declaracion nos por comprende cu e departamento no ta dispone ni di un database, y tin varios tipo di anomalia ta tumando luga. Esey no ta trata solamente e casonan den transicion di gobierno recientemente, sino cu el a bin detecta tambe e casonan di privilegio, unda empleadonan tabata envolvi den haya tereno den erfpacht, sea pa nan mes o pa famia, pa despues bende e tereno, sea cu construccion o un fundeshi ariba, pa hopi placa cu otro persona.

Riba su mes, nos no ta sorprendi. Esaki ta e practica cu tin hopi aña ta tumando luga, den cual miyones a cambia di doño. E caso no tabata limita solamente na familiar di empleado, sino tambe na hende cerca di e ministro(nan) cu tabata haya tereno di e forma aki. E manera di opera tabata semper di gaña cumpli cu ley, den e sentido cu un persona ta haya un pida tereno so na mesun momento, ya cu ley ta bisa cu un persona no por tin dos o mas tereno erfpacht pareu… Pero e por haya dies si, un tras di otro den transcurso di hopi aña… Y como cu no tin un database, cu ta warda e datonan historico, ta parce cu tur cos ta na orden. Esaki tabata e caso tambe tempo cu e famoso investigacion di WODC a tuma luga, y e expertonan Hulandes no a detecta e manera di opera aki.

Ta di aprecia cu e ministro nobo, pa prome biaha den nos historia, ta kibra silencio y ta expone claramente con e corupcion tabata tuma luga tur e añanan ey. Un señal cu e ta dispuesto no solamente pa constata loke ta robes, pero tambe pa restructura y sanea e luga, si ta pa nos, di ariba te abao. Cu esaki ta bay dura un poco mas cu su prome 100 dia den e posicion, nos ta comprende, contal cu e sigui riba e caminda aki.

Pero esaki no ta e unico asunto pa atende. Nos tin e anomalianan cu tabata tuma luga tambe cu emision di tereno comercial/industrial, di cual hopi corespondencia a sali den prensa. Ademas denuncia oficial a wordo haci pa un fundacion y si nos no ta kiboca esaki tin atencion di ministerio publico. Tambe tin un investigacion inicia for di Hulanda cu tabata core caba na momento cu e caso Ibis a cuminsa, y cu supuestamente ta encera iregularidad cu emision di opcion pa tereno comercial.

Banda di tur esaki tin e asunto di hopi aña di pintamento di mapa y privilegio pa peticion di permiso di construccion, cu ta wordo tramita via e pintado di mapa na oficina di Obras Publico. E asunto aki a haya publicidad algun aña pasa tempo cu e presidente di Camara di Comercio a denuncia e practicanan aki, y a hay’e confronta cu exigencia di e director di Obras Publico di e tempo ey. E presidente no a hala atras y e asunto a muri un morto natural. En todo caso, te awe ainda e practica aki ta existiendo y no a ripara cu a tuma paso pa coregi e trato preferencial aki, cu ta un desbentaha pa esunnan cu ta diseña cas y edificio den sector priva, cu ta haya nan cu un competencia desleal di funcionario publico cu ta gana placa extra den banda, probechando di e hecho cu nan ta sinta cerca di unda e decisionnan ta ser tuma. Algo parecido na loke e ministro a señala den e caso di DIP tambe, cu otorgamento di tereno na funcionario, manera señala anteriormente.

Nos no sa ainda unda e proyecto di limpieza aki lo bay termina, pero nos ta spera si cu e ta bay sigui cu ne. E parti di ciudadania cu a vota pa un cambio, no a vota pa cambio di mandatario so. Nan a vota pa un cambio den e forma di goberna, unda practica y encubri corupcion tabata na orden di dia. Naturalmente tur esaki a bira hopi mas urgente despues cu e caso Ibis a bira conoci y a bira obvio cu nos no por a sigui asina. Ta na ki parti di mundo bo ta haya un prome ministro bisa: “Si, mi tabata sa cu e tabata haci esey (bende ontheffing) pero e no kier a stop.” Y el a kere cu ta te ey su responsabilidad a yega?

Tur e practica coruptivo aki mester disparce, pa trece bon gobernacion como norma general, y no como excepcion grandi cu el a para bira den ultimo añanan. Ademas bon maneho no ta kita e problema cu nos a señala varios biaha caba: no tin tanto tereno mas pa otorga, di modo cu por satisface tur peticionario cu tin. Otro solucion lo mester bin den e añanan venidero; uno cu en todo caso ta mustra transparencia.

You May Also Like

Sistema bancario mester upgrade

Banconan comercial y CBA ta protagonista Aruba ta purba realisa un economia innova cu ...

editorial 2_15_1.jpg

Gobierno ta insisti den crea confusion..Cu cua Citgo nan a cera deal?

Keto bay gobierno ta keda referi na ‘Citgo’ como nan partner pa reapertura di ...

editorial 2_15_1.jpg

Aviacion local y Venezuela

Perspectiva pa cobra ta scur Definitivamente no tin ‘success story’ di conta ora ta ...

Tur siman revelacion nobo di gobierno

Y ainda falta… Tur siman ta parce cu e gabinete nobo tin un par ...

Nos mester haci escogencia berdadero?

Awor cu nos a yega den awanan un poco mas trankil, despues di e ...

Nos mester dialogo nacional?

Unda esun anterior a keda? No por a tarda mucho, pa nos tende atrobe ...