Minsiter Dangui Oduber: “Tin un diferencia grandi di pensamento entre director y OMT

Durante temporada di fin di aña comunidad di Aruba por a tuma nota di un articulo di un matutino unda cu director di Dr. Horacio Oduber Hospital, Jacob Vroegop, a comenta cu e vacuna contra COVID-19 no ta duna e resultado desea. Minister di Salud Publico y Turismo, Sr. Dangui Oduber durante e reuda di prensa di ayera a reacciona tambe riba e tema aki y a indica cu den su parecer e expression di e director di hospital “no ta corecto”.

“Mi ta kere esaki no ta corecto. E no ta na su luga cu un director di hospital ta expresa su mes di e forma aki contradiciendo su propio datonan, su propio estadisticanan cu e ta comparti cu Ministerio di Salud”, Minister Oduber a indica.

Minister a sigui bisa cu ta incomprendibel pa su persona como un director di hospital ta bisa cu e vacuna no ta duna resultado si na momento cu hospital tabata experenciando su maximo cantidad di admission na momento cu tabatin 116 persona interna na hospital, 82% di e 116 di e pashentnan no tabata vacuna.

“Aki ta un prueba con e vacuna a yuda nos pa preveni cu hendenan a bira mas malo of te hasta fayece. Na e momentonan ey no tabatin capacidad mas di cama na hospital. Nos mester a manda 35 pashent Colombia pasobra simplemente no tabatin capacidad y ta e vacuna a yuda nos surpasa e momentonan dificil.

Minister ta señala cu e ta lamenta e expression aki y el a menciona cu e la expresa esaki tambe na director di hospital. El a enfatisa cu tur hende tin derecho di expresa nan pensamentonan, sea ta personal of sea ta di nan experiencia, pero den e caso aki, el a sigui bisa,ta imporatnte pa expresa cualkier opinion cu e berdad y papiando e berdad y no e mita berdad pasobra ta e mesun director aki ta comparti e cifranan cu Ministerio di Salud.

Den e cifranan bo ta mira claramente cu e gran mayoria di pashentnan cu ta wordo interna na hospital no tabata vacuna. Con abo como director kier bin bisa den un entrevista cu bo a duna na un matutino cu e vacuna no a duna resultado. Basa ariba e cifrna na cu e mes ta duna nos a comproba cu e vacuna a yuda. Sea e ta lubida cu e mes ta comparti e cifranan aki cu Ministerio of e mes kier a crea un sensacion innecesario pa crea duda den nos programa di vacunacion”, e mandatario a indica.

Oduber a continua y a señala cu diamars anochi e la ricibi un carta di e ‘Outbreak Management Team’ (OMT) cu ta consisti di diferente expertonan, diferente mediconan den diferente expertisioy ta e grupo cu ta conseha e gele cluster kico ta e medidanan cu mester wordo tuma saliendo for di e punto di bista medico y nan ta conseha Gobierno ariba e campaña di vacunacion.

Segun ela indica, tur e expertonan aki, tur e mediconan aki a firma e carta caminda nan ta condena e expresionnan haci door di e director di hospital y nan ta contradeci su ponencia y na mes un momento nan ta recomenda, conseha y stimuli henter e comunidad di Aruba pa bay tuma nan ‘booster shot’.

Na momento cu full bo staff di hospital ta traha un carta cu ta contradeci bo ponencia obviamente e director di hospital mester reconoce cu el a comete un error di expresa su mes di e forma aki y e mester coregi su expresionnan cu a crea un comoshon innecesario pasobra simplemente e cifranan cu nos ta dispone di dje cu e mes ta comparti ta demostra lo contrario”, Minister a agrega.

Pa algun dia no a tende nignun otro declcaracion of reaccion di parti di e director di hospital. Un miembro di prensa a puntra Minster Oduber si su persona a papia caba cu Sr. Vroegop y segun Minister a informa, e director no tabata na Aruba y na mesun momento cu e conferencia di prensa tabata tumando luga, Sr. Vroegop tabata reuniendo cu Ministerio di Salud Publico y tambe diferente colega di OMT. Aunke Minister Oduber mes no por tabata presente na e reunion, el a comenta cu segun locula Vroegop a bisa, ta cu e no a bias esey.

Un otro miembro di prensa a puntra tambe ki efecto e desaroyo aki por tin pa e director di hospital y si e carta di OMT ta significa algo. Den su respuesta Minister Oduber a indica cu e no ta kere ta metemento di OMT den esaki. El a sigui splica cu desde cu e crisis a cuminsa OMT ta e ekipo cu ta duna conseho riba medidanan y duna conseho riba vacuna y na momento cu e director a duna e delaracion , e no a tene consideracion cu e conseho of e punto di bista cu OMT tin riba e vacuna.

“El a bay di forma personal duna un entrevista sin cu e la considera OMT pasobra e tambe ta forma parti di OMT.

Pa loke ta trata e desaroyo di e situacion, Minister a indica cu nan lo tin cu mira e siguiente dianan con nan ta bay atende cu e caso. El a enfatisa tambe cu no ta cuestion cu pasobra e la expresa su mes automaticamente lo tin consecuencia pe. “Mi ta kere nos ta biba den un pais liber tur hende tin derecho di expresa nan opinion pero expresabo opinion cu e hechonan si, cu e informacion corecto, no malinformando creando un sensacion incorecto y creando e impression comosifuera cu e vacuna no lo a duna resultado.