Muchanan migrante, separa for di nan mayornan na frontera entre Mexico y Merca aña pasa, ta sufriendo stress post traumatico y otro problema di salud mental, segun informe di organismo di control. 

Informe di Oficina di Inspector General na Departamento di Salud y Servicio Humano a bisa cu mayoria di mucha ta sufri di angustia, for di locual nan a pasa aden na nan pais di origen of durante nan biahe. Nan ta mustra miedo, nan ta sinti bandona, sintoma di stress.

Algun di nan ta yora. Otro ta kere cu nan mayornan a bandona nan y ta sinti rabia y confusion. “Otro ta expresa sentimento di culpa of miedo, pasobra nan ta preocupa pa nan mayor”, segun informe.

E informe ta e prome informe substancial di un agencia gubernamental tocante e forma con e separacion familiar, bou politica di ‘cero tolerancia’ di administracion di Trump, ta afecta e salud mental di e muchanan.

Inspector General, Ann Maxwell a bisa cu e muchanan separa tambe ta mas hoben cu e instalacion ta custuma di cuida. E separacion ta wordo critica ampliamente y defensor di salud di mucha a bisa cu e muchanan ta sufriendo trauma.

Un mucha chikito, di 7 pa 8 aña, a separa di su tata y no tabata sa e motibo. El a kere cu su tata a fayece y cu e tambe lo wordo mata. “E mucha a haya atencion psikiatrico di emergencia pa trata cu salud mental.”

Algun mucha cu ta separa a sufri di sintoma fisico debi na trauma mental, dokternan ta informa.

E informe ta cubri e periodo di aña pasa. Casi 2.500 mucha a wordo separa di nan mayor. Muchanan migrante ta permanece na un refugio, administra pa organisacion financia pa gobierno, te cu nan ser entrega na un sponsor, sea un mayor of familiar.

 

 

LEAVE A REPLY

Please enter your comment!
Please enter your name here