Na Aruba e amantenan di e ritmo musical conoci popularmente como Salsa ta lamenta e fayecimento di Johnny Pacheco dialuna ultimo.

Pacheco kende a transforma historia di musica Latino Americano cu e genero contagioso di Salsa a muri cu 85 aña na Merca. Pacheco ta conoci como co-fundador di Universidad de La Salsa, e asina yama e orkesta La Fania All Start, a pone baila henter un continente cu su musica masha alegre.

E linguista, Mirto Laclé kende a yega di traha un documentario tocante e ritmo musical aki, a declara na Bon Dia Aruba cu Johnny Pacheco a yega di bin Aruba. Investigacion cu Laclé a haci –usando como fuente e musico Arubiano, Robert Jeandor – a confirma cu Pacheco a bishita nos isla pa atende cu un compromiso musical. E fecha no a wordo estableci precies ainda.

Ta asina cu Bobby Valentin kende tabata e cantante strea durante un presentacion na Aruba, no tabata por a canta. E ora Pacheco a cay aden y te hasta el a training hunto cu Jeandor prome cu e concierto por a tuma luga, ya cu Bobby Valentin a confronta un impasse. Sinembargo na ultimo ora a bin resulta cu Bobby Valentin por a yega Aruba na tempo, y e mes a canta dilanti un gran publico Arubiano. “Pero Robert tin constancia di esaki.” el a bisa

No laga nos lubida -segun Laclé- cu Johnny Pacheco su origen tabata Dominicano. El a nace na Santiago de Los Caballeros, pero for di mucha el a bay biba na New York hunto cu su mayornan tempo di dictadura di Rafael Trujillo. Laclé a menciona cu e tempo aya un incidente cu a sosode entre Trujillo y Jhonny Pacheco su tata kende tabatin su propio grupo musical na Republica Dominicano. E dictador kier a fors’e pa cambia e nomber di su orkesta y pon’e su nomber.

Pacheco tabata un musico virtuoso. Ademas cu e tabata un director di orkesta, compositor y musico, ya cu e tabata un fluitista conoci pa su Charanga. Na añas 70 un exito cu a haci furor na Aruba y cu Pacheco a composita pa La Fania tabata Quitate Tu (Pa Ponerme Yo), interpreta magistralmente pa Cecilia Cruz. E fin di siman aki lo wordo presenta un programa radial special hunto cu e musico Robert Jeandor dedica na e feliz memoria di Jhonny Pacheco transmiti via Radio Galactica.