Na Aruba taboe riba droga pero no riba alcohol

Ainda e debate riba legalisacion of no di cannabis y otro sorto di droga, incluyendo alcohol, no a wordo trata cu profundidad y seriedad na Aruba.

Bon Dia Aruba a papia cu e cientifico Arubano gradua como neuro-psycologo Elizabeth (Eliza) de Sousa Fernandes, kende ta kere cu tur substancia tin nan propiedadnan cu lo por causa cu hende lo por bira adicto na dje; pues no ta existi un siguridad cu nan no ta bira adicto na dje.

Sinembargo mester si compara entre substancianan, ya cu tin substancianan pa motibo di propiedad farmatologico cu ta menos adictivo compara cu otronan. “E topico encuanto legalisacion di marihuana y e impacto di un medida asina ariba henter comunidad ta algo cu ami como cientifico simplemente no por duna comentario sin mas: nos tur ainda mester rasona y dialoga cu otro hopi mas profundo.”

Den e trayecto di su PhD, sra. De Sousa Fernandes ta un experto riba e topico di adiccion. El a forma parti di e proyecto di investigacion “Addictions & Lifestyles in Contemporary Europe: Reframing Addictions Project” (ALICE RAP) cu a wordo inicia pa e Comision Europeo. Durante un entrevista cu Bon Dia Aruba, el a referi na e debate vigente den varios pais, entre nan Aruba,  riba si mester of no legalisa e uzo di marihuana.

E ta kere cu aunke cu tin hopi investigacion haci riba e tereno aki, “e cultura no ta den tur caminda mesun y esaki ta haci e diferencia”.  E ta considera prudente cu prome cu ta wordo duna un paso asina, ta masha importante pa henter pueblo, comunidad, parlamento, pues tur instancia concerni pa ta mas informa kico e ta.

Alcohol tambe ta un droga
“Akinan tin un taboe hopi grandi di substancianan rond di droga. Bo ta uz’e y ya caba nan ta yama bo adicto y bo ta wordo stigmatisa, mientras tin hopi taboe rond e uzo di droga (ilegal). E uzo di alcohol ta socialmente mas acepta, mientras cu esaki tambe ta un droga peligroso cu no por solamente causa daño na e uzado, pero na henter comunidad”.

Informacion y investigacion
E ta un aspecto pa tene na cuenta ora cu ta wordo papia di legalisacion di substancia of tipo di droga, ya cu no tur comunidad ta safe pa haci esey. Ainda e investigacion y informacion necesario mester wordo haci, prome cu bo ta yega di biaha pa legalisa nan, segun sra. De Sousa Fernandes. Un gran cantidad di droga legal y ilegal ta eherce efectonan gratificante door di activa e circuito recompensatorio mesolimbico den e celebro, sea directamente of indirectamente. Ta conoci cu droga tin efecto negativo riba funcionamento di celebro, cu nan ta afecta funcionamento neuro-cognitivo y ta altera e capacidad pa interpreta y evalua.

Sinembargo den e caso specifico di marihuana  (cannabis) a base di investigacion nan por duna indicacionnan of sugerencia pa legalisa su uzo. Pero e ta haya cu den e caso specifico di Aruba, hopi cos ta wordo bruha den otro. E nomber di marihuana pa hopi aña ta den luz publico den forma negativo y ora ta wordo papia di dje, ta wordo papia riba e substancia cu ta causa e cambionan cognitivo, psicologico, fisiologico y subhetivo. “Sin informa si marihuana/cannabis lo por tin propiedadnan cu lo por wordo aplica medicinalmente.”

Cannabis y uzo medico
Mester tene cuenta cu “cannabis” of marihuana  ta consisti di diferente tipo di canabinoide . Te hasta tin algun di nan cu te ainda no a wordo descubri. Esun cu ta pone e hende halto y cu ta produci cambio den su comportacion ta e Tetrahidrocanabinol(THC), cu ta ocasiona efectonan placentero.

Pero tambe ta ocasiona efectonan agudo, ya cu bou su efecto por ta bo ta concentra mas of bo ta mas motiva, pero bo ta corda menos bon tambe. P’esey cannabis ta dificil pa categorisa, ya cu di un banda ta haci bo hopi relax, ya cu si bo ta sufri di hopi ansiedad e ta bah’e. Pero tin cierto hende cu ora ta uz’e ta sinti cu ta subi su ansiedad.

“Tin asina hopi efecto cu ta diferencia cu bo no por bisa cu tin e efecto di cannabis. Pasobra e efecto ta bay ta diferente den cada persona na cada ocasion.”

E ta haya cu si nos kier bin cu un maneho riba uzo di marihuana lo por determina cual ta e canabinoidenan cu ta causa efectonan cu ta produci cambio den su comportacion manera e Tetrahidrocanabinol (THC). Sinembargo ora cu nan ta haci nan investigacion riba e tereno aki, nan no ta bay pa determina e efectonan cu ta positivo of negativo.  Sino cu nan ta presenta tur e efectonan pa asina busca e forma con nan lo por clasifica nan, basa riba nan investigacion.

“Tur cos ta wordo poni den un cuadra. Mi ta kere cu bo ta saca hopi mas asina cu enbes di bay pensa: Ya esey ta positivo of negativo! E no ta funciona asina”, sra. De Sousa Fernandes ta declara na Bon Dia Aruba.

Uzo recreativo
Tin hende cu ta uza marihuana recreativamente y logicamente den e momento ey –segun e cientifico local-  bo ta uza tur sorto di marihuana recreativamente djis pa placer. E ta haya cu ta bon pa tene cuenta cu hopi biaha e concentracion di THC ta diferencia hopi, ya sea den e cannabis sintetico cu ta wordo traha specialmente pa uzo medicinal.

Pero banda di e THC bo por tin tambe CBD cu ta cannabidiol. El a splica cu di un banda cannabidiol no ta psico-activo, mientras di otro banda THC si ta psico-activo. Tin biaha den e marihuana destina pa uzo medicinal hopi bes e tin concentracion hopi abou di THC y concentracion hopi halto di CBD; of tambe interaccion entre ambos substancia. “Pero e mester ta controla pa bo wak ki dosis ta bon pa bo cu no ta causa consecuencia, y cu e por duna bo loke bo ta uzando p’e.”

Hopi biaha e hendenan cu ta uza e producto aki no ta haya niun “high”, e ta señala. Si ta asina su uzo riba e tereno aki tin su beneficionan.  Sinembargo e ta haya cu pa falta di informacion ta existi e dilema cu si e producto aki ta wordo huma ta droga, pero si e ta wordo uza den crema ta medicina. Segun Dr. De Sousa Fernandes,  esey no ta haci distincion entre uzo recreacional y uzo medicinal.

E tipo di cannabis aki, caminda bo no ta haya niun “high” ta cay gewoon bou e categoria di medicinal, ya cu bo tin indicacionnan medico cu si bo ta uza e substancia aki prescribi medicamente, e lo alivia bo sintomanan. “Nan ta pone tur cos den e mesun macutu, mientras cu e distincion ey ta hopi importante pa haci. Mi ta kere cu esey ta e problema.”

Debate legalisacion marihuana
Sra. De Sousa Fernandes ta haya cu tempo ta cambia y nos tin cu adapta nos mes cu e  realidad di e tempo di awendia. Pero prome cu bo ta yega di biaha pa legalisa e uzo di marihuana, mester bin cu mas informacion y investigacion pa ta mas informa riba kico e ta.

Si no tin suficiente informacion, e ta haya cu den e momento ey, bo ta crea un miedo cu ta innecesario paso e riesgonan asocia na e uzo di droga no ta wordo tuma na serio asina.Ta importante pa crea un ambiente di dialogo cu e hendenan por papia riba e topico aki di droga incluyendo alcohol. Di e forma aki e hendenan por ta mas informa, ya cu ta bo mesun salud bo tin cu cuida.

E ta compronde e posicion di e mayornan cu tin yiu y logicamente nan ta percura pa nan no cay den mal uzo of abuso di substancia adictivo. Pero e ta considera cu un tipo di dialogo mas habri rond di e topico aki, tur hende ta wordo beneficia mas door di ta miho informa  pa asina minimalisa peligernan rond di e uzo di alcohol y otro droga nan, ya cu esaki ta un topico cu ta concerni tur hende.

 

You May Also Like

jossy mansur

Fundador Diario Jossy Mansur a fayece

E fundador di Diario Jossy Mansur a fayece. E ultimo añanan e tabata lucha ...

Vacuna di keintura geel a caba na Aruba

Debi na demanda grandi Segun Departamento di Salud Publico, e cantidad substancial di personanan ...

IMG-20161205-WA0052.jpg

Aruba Padvindsters Gilde cu tremendo parada y presentacion

Diadomingo ultimo Aruba Padvindsters Gilde (APG) a uni na Orange Aruba 2016, e campaña ...

11Insel.jpg

Minister lo sinta cu Insel riba monopolio y mal servicio

  Actualmente prijs di vuelo Aruba- Corsou ta carisimo, esaki ta algo cu hopi ...

‘Educacion, legislacion y control ta primordial pa bayena y dolfijn keda bishita nos costa’

Fundado y presidente di Aruba Marine Mammal Foundation Angiolina Henriquez kende tin casi 10 ...