(NTN24) – Minister di Salud Fernando Ruiz a detaya cu esunnan cu ta desea ricibi e dosis adicional lo mester haci por lo menos seis luna despues di e aplicacion di e di dos dosis. E medida lo cuminsa for di 1 di october.

Colombia a aplica caba casi 37.8 miyon dosis di Pfizer, Moderna, AstraZeneca, Jansenn y Sinovac. Casi 16 miyon persona tin skema completo di vacunacion recomenda pa laboratorionan.

Minister Ruiz a conseha pa aplica “e mesun biologico aki” utilisa den e dos prome dosis of vacunanan Pfizer of Moderna, cu ta di tipo ARN mensahero.

Colombia ta registra casi 125.000 morto pa e enfermedad di covid-19 y mas di 4.9 miyon contagio.

E pais di 50 miyon habitante a supera e fase mas critico di e pandemia, for di mita di juli a reporta un baha progresivo di mortonan y infeccion. E di tres pik mas mortal a cuminsa pa via di e variante “mu” segun autoridadnan a indica.

E cartera di salud a reconoce cu vacunacion masivo, cu a cuminsa na februari, ta e motibo principal di e reduccion di cifranan, na e pais por vacuna tur persona mayor di 12 aña.

Otro paisnan como Spaña, Uruguay of Reino Uni a cuminsa administra e di tres dosis den e categorianan di poblacion mas vulnerabel.

Cu 2.259 morto pa miyon habitante, Colombia ta di cuater pais mas afecta pa covid-19 na Latino America, despues di Peru, Brasil y Argentina.

 

 

LEAVE A REPLY

Please enter your comment!
Please enter your name here