Amantenan di fotografia tin un tiki mas cu un luna pa participa den e competencia di fotografia Natures & Faces cu ArtisA conhuntamente cu Prins Bernhard Cultuurfonds a introduci ayera atardi den un conferencia di prensa.

ArtisA cu ta nifica ‘Art is Aruba’ ta e organo cu ta organisa e concurso di Fotografia di Naturalesa y Caranan, hunto cu otro proyectonan artistico mas como Aruba Art Fair y ta funciona como un non profit organization.

Bruno Guerra cu ta forma parti di ekipo di Artisa a splica cu Nature & Faces a haya un bon acogida ora cu Doral City Hall na Florida a habri su portanan pa expone e fotografianan di Aruba di e 5 persona clasifica na aña 2017, for di e aña aki hopi persona a participa den dje mustrando naturalesa y cara di hendenan di nos dushi isla.

Armando Goedgedrag un artista local di fotografia hopi na conoci na Aruba pa su potretnan di naturalesa, specialmente di lama y turtuganan tin bou su man e categoria “Nature”, el a papia tocante fotografia di naturalesa na unda cu el a señala cu manera tur hende sa Aruba ta un pais hopi bunita na unda cu tur hende cu ta biba den pida di baranca aki por gosa di dje como por ehemplo, lama, tera, parhanan, cangreunan, sunset cu shelo hopi bunita unda cu esunnan cu tin interes di participa por tuma den cuenta como un tip pa saca varios potret.

“Esaki ta un nice oportunity pa por wak Aruba den diferente manera, pasobra cada persona tin un otro vision cu nos por wak e ora y cu ta hopi nice”, Goedgedrag a bisa.

El a informa na Bon Dia Aruba cu e tin un proyecto grandi cu proximamente comunidad lo tende di dje pa loke ta trata mural, Goedgedrag tambe ta conoci pa pinta mural na unda e tin un di un turtuga na San Nicolas y cu e lo sigui cu esey ademas di pinta cuadronan grandi.

Asina mes, el a expresa cu un evento manera esaki di Natures & Faces ta algo hopi great pa Aruba y ta trece esunnan cu ta dedica nan tempo pa fotografia pa wak ki calidad nan tin y perspectivanan pa inspira otro, igualmente pa inspira hende cu no ta saca potret cu por wak algo diferente den isla.

“Loke ta inspira mi hopi ta e balor di nos naturalesa e mayoria di biaha den pasado e no a wordo aprecia hopi y mi ta wak’e cada biaha mas, mi ta wak esey como un tool great tambe pa inspira hende pa proteha nos naturalesa”.

Glen Geerman conoci como “Sombre Visuals ” ta un otro Arubiano cu tambe ta participa den e competencia aki y su specialidad ta fotografia di cara pa e categoria “Faces”, el a expresa cu Aruba tin mas di shen nacionalidad y diversidad, esey lo ta bon pa esunnan cu lo kier participa por usel’e pa documenta e potretnan di caranan cu lo bay presenta den competencia aki.

El a duna como conseho pa usa gruponan grandi of un hende mes pero cu unidad, pa purba di trece e parti di Aruba den e potret como su cayanan, “usa Aruba como bo background” usando e nacionalidad di diferente persona cu ta biba na Aruba, cu tambe ta e deseo di e fundado di Artisa, Tito Boliva ora e actividad aki a wordo crea.

Sombre Visuals a conta na Bon Dia Aruba cu el a participa den evento aki na aña 2017 pero e no a logra di clasifica, despues el a bay Hulanda na unda e no por a participa den edicion number dos ni den edicion number tres, ora el bin back Aruba el a dicidi di drenta como e cara pa e evento pa motibo cu el a gusta kico ta e concepto cu e actividad aki ta treciendo dilanti, “e ta manera algo hopi cu nos ta celebrando e mundo di fotografia y esey ta algo hopi importante pa mi”, Geerman a sigura.

Con pa participa? Pa participa ta facil, te dia 3 di december e fotografo tin e chens di bishita e website www.natureandfaces.com y registra su persona, despues por subi (upload) e fotografia den e categoria faborito. Mas informacion y e reglanan por lesa riba e website.

Pa cera e concurso aki lo tin un exposicion di tur persona cu a clasifica den Nature y Faces den ArtisA su galeria na San Nicolas, unda Aruba henter por pasa admira e obranan y vota pa kende lo bira e ganado absoluto di 2021.

Alabes clasificadonan su obra lo ser exponi na Doral City Hall, Florida, e ganado ta bay cu e premio di 500 dollar na BNH Video Photography cu envio completamente gratis pa Aruba.

Pa mas informacion bishita e website www.natureandfaces.com of yama +297-593-4475.