Banda di e bishita cu representante di 10 compania of inversionista cu a participa den e destaho publico (Request for Expresion of Interest I) y cu a keda selecta pa bin bishita e instalacion di refineria na San Nicolas, fraccion di MEP a haya tambe mas informacion relaciona cu e huurmento di tankinan di almacenamiento di combustibel.

Parlamentario Endy Croes a referi cu nan a haya informacion cu shete tanki ya caba ta den funcion. Pero el a bisa cu na e “momento aki ya caba nan a cuminsa genera entradanan pa gobierno.”

Ademas tin un cantidad di tanki entre 15 pa 17 cu lo bay pasa den un remodelacion cu lo tuma luga den e lunanan nos dilanti. Pa 2021 ora cu e tankinan aki ta full cla pa opera, e dividendonan cu esaki lo bay significa via Refineria di Aruba (RdA) pa gobierno, lo ta uno cuantioso. Sinembargo e parlamentario no a menciona cifra. Tampoco e nomber di e compania cu a huur e shete tanki y cu ya caba a paga na e compania estatal RdA pa haci uzo di nan.

El a bisa cu loke nan por a compronde for di gobierno ta cu RdA lo bini cu un conferencia di prensa pa duna tur detaye, entre nan, esunnan cu ta bay opera e tankinan, etc. Loke nan a wordo splica tabata cu ya caba tin 7 tanki den funcion.

“Y e shete tanki aki a cuminsa produci un ‘x’ suma caba pa gobierno,” segun parlamentario Endy Croes. E no a duna mas detaye ya cu e parlamentario ta prefera di papia cu documento den man. E mes a pidi gobierno pa dun’e un descripcion di kico ta locual e ingreso di e tankinan aki ta significa. “Mi no haya esey ainda, y mi no kier transmitie te ora cu mi no haya e documento oficial di gobierno,” el a bisa.

 

LEAVE A REPLY

Please enter your comment!
Please enter your name here