“Mi por compronde cu henter e debate den media por ta confuso pa comunidad, sinembargo esaki no ta nifica cu e partidonan no ta den negociacion.” Asina Representante di Gobierno Hulandes, Erwin Arkenbout a bisa Bon Dia Aruba

A tuma contacto cu Sr. Arkenbout basa riba e intercambio di palabra entre Gobierno di Aruba y particularmente Secretario di Estado pa Asuntonan di Reino, Raymond Knops cu a escala diabierna ultimo cu dos relato di prensa hopi skerpi contra otro.

Segun e Representante di Gobierno Hulandes, “berdad tabatin discusionnan hopi skerpi cu a tuma luga den e siman cu a pasa. Pero e bon ta cu ambos partido a bisa tambe cu ta dispuesto pa sigui papia cu otro.”

Erwin Arkenbout a mustra cu ningun momento tabatin kiebro den e negociacionnan cu ta andando desde 10 di juli. “Claro cu tin cierto tempo entre algun di e reunionnan, pero esaki ta pa por haci e trabaonan necesario.”

Prinsjesdag y Covid

Mester bisa cu Gobierno di Aruba, particularmente Prome Minister, Evelyn Wever Croes y Minister di Finanzas, Xiomara Maduro a haya ironico cu Raymond Knops a declara publicamente pa medio di un relato di prensa, cu e negociacionnan mester sucede pafo di media. Particularmente pasobra Aruba a mustra cu Hulanda mes na tres ocasion a bay prensa. Y esaki lo a cuminza cu e propio declaracion di Erwin Arkebout diamars pasa.

“Esey nunca tabata e intencion, esta di drenta un discusion publico cu Aruba via media. Locual a sucede ta cu normalmente riba Prinsjesdag, e Representacion di Gobierno Hulandes ta tene un recepcion, unda e Representante ta hiba un discurso. E discurso ta contene e mensahe di Gobierno di Hulanda pa e paisnan cu ta forma parti di Reino Hulandes.” Locual a sucede ta cu contrario na añanan anterior, Representacion di Hulanda no por a tene un recepcion cu invitadonan pa motibo di Covid19. Y como ta a dicidi pa duna e mensahe pa medio di nan pagina di Facebook. “Pues no ta asina cu mi a bay den publicidad specificamente pa e negociacionnan andando.”

Ta negociando

Den fin di siman, Prome Minister di Corsou Eugene Ruggenaath a duna un discurso nacional, unda el a mustra cu a pesar di tur cos, e opcion pa bay de acuerdo cu e condicionnan di Hulanda ta e miho alternativa pa su pais. Sinembargo, asina mes te ainda Corsou no a firma y Arkenbout a bisa cu mescos cu Aruba, Corsou tambe ta den negociacion. “Tin biaha ta necesario pa informa comunidad di e progreso di negociacionnan, pues ta depende na diferente factor ki ora ta bay den publicidad of no.”

Como tal, Arkenbout a bisa cu despues di e ultimo relato di prensa di Aruba, e mes no ta kere cu ta prudente pa bay duna reaccion pa asina no stroba cualkier negociacion. “Aruba ta tumando su pasonan pa haya mas tempo pa negocia.”

Erwin Arkenbout a mustra cu como tal, mester confia riba e palabra di tanto Hulanda como Aruba, cu a bisa cu nan kier sigui negocia na bienestar di pueblo di Aruba.

 

LEAVE A REPLY

Please enter your comment!
Please enter your name here