Ayera mainta, Directie Volksgezondheid (DVG) a publica riba nan rednan social nan cifra total di casonan di Covid-19 na Aruba separa pa gruponan di edad, cantidad di persona interna den Hospital Dr. Horacio Oduber y cantidad di morto.

Di esaki, hopi preguntanan a bin dilanti pa loke ta trata cantidad di testnan haci pa cada grupo, pa motibo cu a keda conoci e cantidad di casonan positivo, pero no cuanto test a haci pa cada categoria di edad.

Bon Dia Aruba a tuma contacto cu Jurette Croes, PR di DVG y el a señala cu te ainda nan no tin e cifranan specifico ey. E intencion di nan publicacion ta pa wak cuanto caso di Covid-19 tin na Aruba cu diferente edad y con nan ta varia.

Ademas den varios comentarionan cu comunidad a haci riba e publicacion aki, algun persona a enfoca riba casonan di mucha entre 0 pa 15 aña, cu te awe tin 150 caso positivo, loke ta representa 0.6% di 22.500 mucha cu tin na Aruba, segun propio dato di DVG. Pero ningun caminda tin publica den e 28.441 total di e test cu a wordo haci na Aruba cuanto mucha a test entre 0 pa 15 aña, cu ta un dato hopi importante, mirando cuanto contagio ta tumando luga na mayoria di scolnan na Aruba y den seno familiar of na cas.

Segun datonan di DVG, mayoria di mucha cu a test positivo entre 0 pa 15 aña, tur ta recupera sin necesidad di cuido medico.

Siman pasa, a traves di un presentacion di epidemioloog Garreth Tromp, a ilustra a base di porcentahe, cu 50% di transmision ta tumando luga na cas of den seno familiar y 25% no tabata conoce e origen di e contagio.

E grupo cu mas casonan positivo ta entre 15 pa 34 aña, cu un total di 1.279 caso. Y segun DVG, ta esunnan cu ta yuda transmiti e virus, pa loke tambe a puntra si ta asina halto e cantidad entre muchanan hoben, dicon no a cera scolnan un biaha mas.

Un comentario cu a hala atencion ta un pregunta cu un usuario a haci pa DVG cuminsa pensa kico pa haci cu scolnan, principalmente scolnan secundario cu tin cluster y lo sigui plama e virus. Studiantenan di e edad aki tin necesidad di socialisa y aunke algun di nan por haya sintomanan leve, lo sigui plam’e. Docentenan, mayornan, welonan tin cu deal cu e consecuencianan di tur esaki, mientras cu hospital no tin capacidad suficiente.

Tocante esaki, Croes a menciona cu aunke esaki ta e grupo cu tin mas caso positivo, nan no ta den e grupo cu ta drenta na hospital ni den e grupo cu ta fayece, cu ta den edad desde 55 aña bay ariba.

Di otro banda, siman pasa Centro pa Control y Prevencion di Malesa Mericano, (CDC) a reverti un guia controversial pa testing pa coronavirus, den cual tabata bisa cu un hende cu tabata exponi na un persona infecta pero no tabata presenta sintoma, ‘no necesariamente tabatin mester di un test’.

Den e guia nobo ta bisa cu un hende sin sintoma, kende tabata den contacto cercano cu un persona positivo ‘mester haci e test’. CDC ta defini contacto cercano como ta den 2 meter di distancia di un persona cu un infeccion confirma cu Covid-19 pa sikiera 15 minuut.

“Testing ta recomenda pa tur contacto cercano di un persona infecta cu Covid-19, pa motibo di transmision asintomatico of pre-sintomatico, ta importante pa busca personanan cu a haya contacto cu personanan contagia pa wordo identifica y haci test”, aunke na Aruba aworaki esey no ta vigente, segun Dr. Van Trigt di HAVA durante un conferencia di prensa di siman pasa el a splica cu na e momentonan aki e rekisito pa un persona por test ta hopi abao y e persona mester tin un of mas di e sintomanan.

Den e guia di CDC tambe a señala cu tin cantidad di estudio cu ta mustra cu hende por carga y transmiti e virus sin mustra sintoma – tanto den etapa pre-sintomatico y den casonan unda nan nunca ta desaroya sintomanan. Specialistanan di salubridad publico y oficialnan di Organisacion Mundial di Salud (WHO) constantemente a enfatisa e importancia di test hende cu no ta presenta sintoma pa asina corta e cadena di transmision.

Hopi specialista di salubridad publico a critica e cambio den guia di test di CDC na augustus, pa parce di bagatelisa e importancia di test hende cu no tin sintoma, pero cu por ta transmitiendo e virus.

CDC a referi na e cambio den e guia como un ‘clarificacion’ notando ‘e necesidad di test persona asintomatico’.

 

LEAVE A REPLY

Please enter your comment!
Please enter your name here