‘No ta facil pa acepta pero un caminda mester cuminsa cu esaki’

E prome persona masculino cu ta un transgenero y ta identifica su mes como femenino a logra pa corte acepta e cambio di su nomber(nan) den uno di su gusto. Oficialmente den documento manera paspoort, ainda e ta keda wordo reconoci si como un ser masculino.

E persona aki cu ta yama su mes Foxy Roxy, no ta desconoci den nos comunidad. Ya pa basta aña e ta publicamente demostra su identidad sexual y tambe ta un defensor di e comunidad LGBT.

Bon Dia Aruba a tuma contacto cu Roxy y e ta splica cu tur hende tin derecho di ta feliz den propio genero sea straight, LGBT of transgenero. “Acepta bo mes ta lo primordial. Sea confortabel cu bo mes. Hopi importante sigur prome cu tur cos ta aceptacion den bo hogar mama tata ruman. Una bes esey pasa, ta mas facil pa un persona LGBT ta mas sigur di su mes y logra metanan cu e lo pone su dilanti.” E ta sigui splica cu transgender id ta hopi importante pa ‘cierto di nos nan aki na Aruba, specialmente pa esunnan cu ta tuma e paso pa ta den su totalidad transgender’. Roxy ta sigui bisa cu no ta facil pa aceptacion riba un isla chikito pero di un caminda mester cuminsa cu esaki ‘paso tin mas cu hende ta pensa’.

Tambe nos a papia cu Desiree De Sousa-Croes kende actualmente oficial ta director di Arubahuis ainda, e ta un consehero huridico (abogado) y un activista ferviente pa loke ta derechonan igual aki na Aruba. Sra. De Sousa-Croes no a representa Roxy oficialmente den corte pero si a guia henter e proceso.

Proceso huridico
E proceso huridico riba su mes por ta hopi simpel segun sra. De Sousa-Croes ta splica. Esaki ta inicia cu un declaracion medico, unda cu ta confirma cu e persona tin (den termino medico) gender dysphoria, pues cu ‘el a nace den e curpa robes’.

Unabes cu e parti aki ta cla, ta haci e peticion na corte pa e cambio di nomber (y no fam) tuma luga. Den e proceso aki tambe ta manda puntra censo si tin un obhecion cu e cambio aki. “E parti di censo ta uno mas bien formal ya cu nan rol den e proceso no ta hopi esencial. Den e caso aki, censo a splica di biaha cu nan no tin niun obhecion cu e cambio di nomber”, sra De Sousa-Croes ta bisa.

Den caso di Roxy, e peticion a wordo haci na luna di januari e aña aki y corte a tuma su decision na april, den algun minuut ya cu pa nan ‘tabata cla cu e deseo di cambio ta uno sostenibel’, segun sra. De Sousa-Croes. “Mi ta kere e tres (3) luna ta mas bien pa motibo cu corte ta hopi druk den e temporada aki.”

Proceso medico
“No ta asina cu bo ta djis yega y bisa awe mi ta transgenero y bo ta haya un declaracion medico”, sra. De Sousa-Croes ta bisa. E ta splica cu e grupo di activista LGBT cu e ta forma parti di dje ta traha tambe cu un grupo di profesionalnan den e ramo medico pa asina percura cu tur cos ta cana manera mester ta.

“E no ta djis un examen fisico pero tambe uno psicologico y psikiatrico.” Bo mester tin por lo menos 5 aña ta biba caba den bo ‘genero cu bo ta identifica bo mes cu ne’ y mester pasa door di evaluacionnan cu ta demostra cu no ta ‘djis pa pret bo ta hacie’.

Cambio di sexo oficial
Na Hulanda ya caba ta acepta cambio oficial di sexo tambe, pues si bo tin tur documento necesario bo por bay na cualkier gemeente y haci e peticion. Tumando na consideracion cu awor Boneiro ta un provincia Hulandes y recientemente tambe ta tuma e registro di cambio di sexo oficialmente, esaki ta habri porta pa registro por tuma luga mas cerca di Aruba.

Sra. de Sousa-Croes ta splica cu ya e tin algun luna ta caba a pidi Hulanda pa Aruba tambe cay bou di e mesun reglanan cu tin na Hulanda, haciendo asina cu no necesariamente bo mester tin 1 aña biba na Hulanda mes pa bo por pidi e cambio di sexo. Si corda riba e caso di Oduber-Lammers, un proceso igual a ser cana.

Na momento cu haya e aprobacion aki, lo por bay e ora Boneiro pa registra di cual un acta oficial lo sali y esaki lo por wordo registra e ora den tur pais den reino segun e acuerdonan.

Transgenero na Aruba
Sra. De Sousa-Croes ta splica cu segun cifranan internacional, un total di 0.03 porciento di e comunidad ta transgenero. E ta bisa cu ‘tin hende ta bisa cu ta menos pero ami ta kere cu ta mas’. E ta sigui splica cu e no ta sigur si tin di haber cu cultura of cu ta paso nos ta den un sociedad chikito, cu bo no ta mira e personanan aki ta expresa nan genero cu nan ta identifica nan mes cu ne mas habri.

“Te caminda cu mi sa, nos tin diesseis (16) persona na Aruba cu ta abiertamente demostra cu nan ta transgenero. Gran parti di e personanan aki ta biologicamente masculino cu ta identifica nan mes como femenino.”

Di e grupo aki, actualmente tin tres otro persona cu ta pasando den e proceso medico pa asina inicia e parti huridico, pa finalmente por logra cambia nan nomber oficialmente.

Codigo Civil
Nos a probecha e momento di entrevista pa puntra sra. De Sousa-Croes riba e ‘famoso’ amienda di registracion di pareha. E ta comenta cu e ta haya ‘jammer cu ainda no por ehecuta e buki nobo di codigo civil, cual tin mas cu 800 cambio pa motibo di 1 solo amienda’. Aunke e amienda original a wordo cambia, e esencia a keda igual, cual ta cu personanan por registra nan convivencia civil sin tin nodo di ta casa.

Sra. De Sousa-Croes ta splica cu si wak e constelacion actual cu a forma gobierno, e cambio di nos buki di codigo civil lo mester por pasa lihe y sin ningun problema. Tanto miembronan di MEP, POR y RED a para firme pa igual segun sra. De Sousa-Croes. “Ta parce manera tur hende a haya culio paso e tema aki no ta wordo papia mes mas di dje.”

Durante e siman aki nos redaccion lo busca mas reaccion con e proceso di e introduccion di e buki nobo di nos codigo civil ta canando ya cu el a keda aproba den parlamento algun luna pasa.

You May Also Like

Hoben scout cambiando mentalidad riba uzo di plastic diario

Ayera mainta a tuma luga un actividad di Arubaans Padvinsters Gilde, como parti di ...

Abuso sexual di mucha: un aña despues di manifestacion y nada no a cambia

Fundacion Lisette Gomes: Stop Abuso Sexual di Mucha #LOCAL Abuso sexual di mucha: un ...

SADA: descripcion funcion ta mustra ‘falta di respet’

ORANJESTAD – Sindicato Aduana di Aruba (SADA) a tene un reunion cu nan miembronan ...

Carnival Legends Festival

Carnaval 62 ta on. Scucha e jingle aki. 30 nov peticion pa kavel

Awe e temporada di Carnaval a cuminsa y SMAC lo inicia esaki awe nochi ...

AHATA: Maart tabata un luna positivo pa turismo

ORANJESTAD – CEO di Ahata, Tisa LaSorte, a anuncia cu maart tabata un luna ...

‘Danki Aruba pa sostene nos artista internacional Jeon!’

Diaranson anochi un publico grandi a presenta dilanti Bestuurskantoor pa duna Jeon un bon ...