No tin un maneho di control cla pa ley di saco


Danilo Prescott di Bureau City Inspector ta bisa Bon Dia Aruba: “Aworaki sinceramente nos mes ta buscando informacion pa wak con e cos aki ta hinca den otro.”  E ta sigui bisa cu Bureau City Inspector no a haya nada preto riba blanco ainda. Nan no tin ningun plan di maneho cla pa trata cu e ley di prohibicion di uzo di saco di plastic.

“Nos a wordo bombardia cu yamadanan pa con nos ta bay controla esey, pero nos mes no a haya nada ainda riba papel”, sr. Prescott ta bisa.  Bureau City Inspector ta tumando contacto cu gobierno mes, cu Directie Wetgeving y Juridische Zaken & Directie Economische Zaken pa wak con ta bay hinca esaki den otro, e ta splica Bon Dia Aruba.

Sr. Prescott ta agrega cu City Inspetor  ta bay yuda controla cua ta e supermercadonan cu ainda ta uzando saconan di plastic. Sin embargo ainda nan no por bay over na partimento di multa pasobra mester warda un periodo pa e saconan di plastic sali for di circulacion. E ta añadi cu nan tin suficiente hende pa por controla e supermercadonan rond di Aruba. “Tin hopi luga pa controla pero bo no ta bay tarda 1 ora den cada luga pa bo controla nan. Pues ‘mankracht’ nos tin suficiente.”

Cooperacion di comunidad
Parlamento a aproba e ley cu ta prohibi e uzo di saco di plastic 30 di juni 2016 pa bay na vigor 1 di januari 2017.  E departamentonan encarga cu e control di esaki ta Departamento di Naturalesa y Medio Ambiente, Bureau City Inspector y Polis.  Bon Dia Aruba no a logra haya un reaccion  con Cuerpo Policial ta prepara su mes riba e cambio aki.

Director di Departamento di Naturalesa y Medio Ambiente (DNM) Gisbert Boekhoudt, no por a comparti nada cu Bon Dia Aruba pa locual ta nan rol. E departamento aki tambe t’ey pa yuda reduci e cantidad di saco di plastic riba nos isla. DNM a referi Bon Dia Aruba na gobierno pasobra nan  no por papia cu prensa.

Den un publicacion diamars, Bon Dia Aruba a informa cu segun parlamentario Donny Rasmijn (AVP) cu a tuma e iniciativa pa cambia e ley, e miho control ta e cooperacion di comunidad. Si lo tin algun comerciante cu no tene su mes na ley, nos ta pidi cooperacion di tur hende cu lo wak esaki pasa pa no solamente yama autoridad encarga, pero seguramente tambe pa comparti cu e comunidad pa asina e implementacion di e ley aki bay den un manera mas exitoso.” Bon Dia Aruba a purba pero no logra haya un reaccion di sr. Rasmijn of gobierno riba dicon City Inspector no a haya algo oficial y ki dia lo cuminsa controla. Como cu tin hopi tienda, manera supermercadonan chikito cu ainda ta parti saconan di plastic.

Transicion
E transicion pa stop cu e uzo di saco di plastic a cuminsa caba na tur supermercado grandi y tambe chikito.  Na Ling & Sons por ehempel bo ta haya saconan di papel gratis anto bo por cumpra bo saco re-uzabel pa 5 florin. Mescos ta conta pa Superfood & Certified como tambe otro supermercadonan chikito ta ofreciendo saconan re uzabel pa bende entre 2 pa 5 florin.

Bon Dia Aruba por a tuma nota cu na varios supermercado chikito nan a cuminsa pone un papel na e cahera cu ta indica prohibicion di saco di plastic. Ciudadanonan riba rednan social ta comenta cu nan ta contento cu e cambio aki anto ta spera di wak un diferencia pronto. Otro ciudadanonan ta comenta cu e ley aki ta mustra cu e ta bay ta mesun  inutil cu e ley di cacho. Bon Dia Aruba siguramente ta bay keda pendiente cu e desaroyo di esaki.

 

 

 

 

 

You May Also Like

FB_IMG_1470434758109.jpg

Morto di futbolista Johnny Gomes ta sospecha di ta un homicidio

– Den cuadro cu morto di futbolista Johnny Gomes cu a sosode siman pasa ...

Alex Schwengel JO Rijbewijs.JPG

Minister: casnan priva di cuido di nos grandinan ta laga hopi di desea

E casnan priva di cuido di nos grandinan ta laga hopi di desea asina ...

hqdefault.jpg

Linguista Mirto Lacle lo realisa presentacion riba inmigrantenan Portugues na Aruba

E linguista y promotor cultural, sr. Mirto Lacle a informa na Bon Dia Aruba ...

Padrastro ta confesa di mata Roshandrick

Aruba ta den shock desde ayera ora e noticia a drenta cu autoridadnan a ...

Ainda SIA no sa cuanto cliente no a paga number di auto

E cantidad di hende cu ainda no a paga e number di auto 2017 aparentemente ...

Gobierno a keda cu 3 miyon inhusto, suma mester bay na ciudadanonan

Un caso unda un ciudadano ta buscando su derecho contra un decision di gobierno ...