E Secretario General Víctor Zamora di  e sindicato di trahador di Intevep (Sintraintevep), cu ta e filial tecnico di PDVSA, a enfatisa  diabierna pasa cu 80% di e produccion di petroleo ta destina pa exportacion, y cu di esaki 41% ta pa paga e compromisonan adkiri cu China, segun Notociero Digital ta reporta. Esaki ta alrededor di 32,8% di e produccion total.

Den entrevista pa e programa Primera Página, transmiti pa Globovisión, Zamora a declara cu, debi na e reduccion di e produccion di crudo, como parti di e acuerdonan alcansa den OPEC, e prijs di petroleo Venezolano a subi cu un 15% durante e ultimo lunanan di 2016. “Desde cu nos a toca fondo cu prijs abao den prome trimester di aña, nos a alcansa un incremento di 84% di e prijsnan di  petroleo Venezolano”, el a manifesta.

Seguidamente, el a splica cu desde e luna aki lo cuminsa  pa adecua henter e ekipo di produccion pa baha e cuota cu ta  coresponde na Venezuela.
El a indica ademas cu segun e ultimo informenan di OPEC, Venezuela ta produci alrededor di 2, 2 miyon bari di petroleo pa dia. “Nos ta bay kita 25 .000 di esey, pasobra tur no ta bay baha den un siman, esey tin su proceso, y despues nos ta bay alcansa nos cuota”, el a agrega.

Un 80% di loke e pais ta produci ta bay pa exportacion y e 20% restante ta keda pa procesa den producto di refinacion. El a señala cu “41% di loke nos ta  exporta ta bay pa paga e compromisonan cu nos tin cu e pais Asiatico. Nos mester corda cu China tin un inversion fuerte den nos pais”, el a señala.

Di otro banda Zamora a indica cu na Venezuela ta sigui “maneha importacion pa e tema di e preparacion di combustible y tambe diluente pa compensa loke ta e produccion di e crudonan liviano ey”.

El a termina bisando cu esey lo sigui haci, mientras ta prepara e produccion y tecnologia pa stimula produccion di e crudo nobo cu ta bay yuda pa dilui e crudo extra pisa di e faha di Orinoco, pa bende na e calidad cu nos mester como pais, productor y exportador”.

NOTA di redaccion: Segun informe di e sector petrolero e pago di debe cu petroleo di Venezuela na China ta tuma lugar na un prijs conveniente pa China, cu ta bao nivel di prijs mundial.