Nos studiantenan na Hulanda… Tema di debate na Hulanda…

Segun informacion di e website koninkrijksrelaties. nu nos studiantenan, no di Aruba so sino di tur e islanan di Reino Hulandes den Caribe, ta obheto di preocupacion serio di autoridadnan Hulandes y di representantenan di institucionnan educativo na nievl superior (HBO y Universidad). Finalmente di nan banda awor ta bati alarma pa un problema cu ta ampliamente conoci cerca nos, pero riba cual practicamente a traves di varios aña nos no ta mira ningun avance. Ta trata di e nivel pober di prestacion di nos studiantenan na Hulanda.

Den un di e articulonan tocante e tema aki un representante di Hogeschool Rotterdam, cu tin varios cien studiante di Caribe Hulandes, ta conta cu a pesar di nan esfuersonan pa logra miho resultado, tres di cada cuatro studiante no ta caba nan estudio na e institucion aki. Esey ta un resultado realmente hopi pober. Hasta si nos kere cu e scol aki ta un excepcion, den sentido negativo, probablemente tin varios otro cu por tin un experiencia similar.

Banda di critica ta tende tambe sugerencia pa mehora. Un di nan ta pa bin cu un curso preparatorio, y obligatorio, pa studiantenan di e islanan cu ta bay studia na institucionnan superior na Hulanda. Segun e persona a informa, a deposita e idea aki caba cerca e actual minister van Engelshoven di Enseñansa, cu no a contesta ainda. Nos no sa si un curso asina mester ta obligatorio, pero lo por laga tur haci test pa comproba nan nivel di dominio di e idioma y si ta necesario, laga nan hacie. Sin embargo, tin algo cu ta molestia nos den tur esaki. Esey ta cu desaroyonan den enseñansa na Hulanda tampoco a keda para keto y awendia tin masha hopi studiante di diferente continente ta studia na Hulanda. Asina bon nan Hulandes ta anto? Den cierto caso si, pero e gran mayoria… no ta studia na Hulandes mes, sino na Ingles.

Practicamente no tin un institucion di educacion superior na Hulanda cu no ta ofrece gran parti o hasta nan programa completo na Ingles. Nos sa di experiencia cu e dominio di Ingles en general di e studiantenan di Aruba ta miho cu nan Hulandes y si di Sri Lanka te Malasia hende por studia na Hulanda, cu apenas suficiente Hulandes pa comunica cu e cahera na supermercado, anto pakico no e Arubiano o Antiyano cu tin problema cu Hulandes. Ademas, no ta asina cu na Aruba mes nos universidad ta maneha Ingles na cierto facultad? Cu esun di ley ta na Hulandes ta di comprende, pasobra esey ta e idioma di e profesion y sin un conocemento profundo di Hulandes bo no por funciona como hurista.

Cu esey nos no ta haci propaganda pa nos studiantenan bay Hulanda sin siña Hulandes drechi. Biba ta mas cu studia so y integracion y aceptacion den cualkier comunidad ta bay hopi mas facil si un persona ta domina e idioma di e pais bon. Si esey no ta berdad anto nunca ningun hende lo ta haci un esfuerso pa siña e idioma di e pais bon. Acaso nos mes no ta keda irita ora nos ta topa cu hende cu tin suficiente tempo na Aruba pa nan por a siña Papiamento y sin embargo nan no ta papia casi nada? E mesun argumento ta conta ora nos ta bay biba den pais di otro hende. Ademas, esnan cu ta pretende di bin traha pa gobierno di Aruba lo mester siña Hulandes di tur manera, pasobra esey te awe ta e idioma fundamental den aparato publico. Durante ultimo decadanan caba nos por a ripara cu aki tambe e dominio pober di Hulandes tin su repercusion pa trabao gubernamental y lo no ta malo si ta cuminsa mehora esaki, tambe entre e personal existente.

Pregunta ta: kico nos ta bay haci aki na Aruba cu e informacion aki? Independiente di loke ta bay haci na Hulanda pa mehora e situacion ora e studiantenan yega na nan porta, nos tin e obligacion di analisa na nos banda con nos por remedia e situacion aki. Y esey preferiblemente sin busca argumento pa hustifica cu e situacion cerca nos ta loke e ta, cu consecuencia cu nos no ta haci nada, atrobe.

Un di e problemanan grandi ta cu e nivel general di dominio di idioma ta mara na lesamento, y lesamento varia. Si bo ta keda bira rond lesando e mesun tipo di lectura, bo no ta avansa den amplia bo vocabulario, den ningun idioma. Otro aspecto relaciona cu esaki ta e capacidad di skirbi, di produci un texto di cierto nivel di cierto materia cu bo ta comprende. Nos no ta na altura kico e scolnan ta haci caba riba e tereno aki, asina ta cu nos no ta bay conclui cos cu nos por huzga, pero e ta un preparacion hopi importante pa esnan cu ta bay sigui un estudio superior. Drecha nivel general di nos studiantenan no ta algo di corto plazo, sino di inverti pa hopi aña den un esfuerso structura. Prome cu cerca nos hende cuminsa grita cu na Hulanda nan ta discrimina, ban pensa prome kico ta haci aki, pasobra ta aki e problema ta origina.

You May Also Like

Kico e cifranan general ta conta nos?

Riba e bon caminda? Banco Central a caba di publica algun dia atras, su ...

Dos cara di mesun gobierno?

Mientras Aruba no a bin ‘bij’ ainda di e impacto cu e invasion hudicial ...

Ki dia Setar ta bay Ministerio Publico?

E noticia grandi siman pasa tabata esun di e ex empleado di Setar NV, ...

Ken ta sirbi ken?

Nos t’ey pa sirbi gobierno?   Un empresario, di un NV local, ta dicidi ...

Trabao no falta pa gabinete nobo

Problemanan no ta di mandatario so Trabao no falta den e prome siman di ...

editorial 2_15_1.jpg

Gobierno ta insisti den crea confusion..Cu cua Citgo nan a cera deal?

Keto bay gobierno ta keda referi na ‘Citgo’ como nan partner pa reapertura di ...