Nos ta wak solamente e ganashi a corto plazo?

Na algun momento den curso di aña 2011 o 2012, un di nos redacrtornan tabatin un conversacion ameno riba su mes, pero confrontativo pa loke tabata su contenido, cu un asesor di e gobierno anterior na esun na mando e tempo ey. Tabata discuti e tema si e ministro encarga na e momento ey cu turismo, hunto cu su colega di infrastructura, lo mester a yega na un moratorio riba capacidad di hotel y otro acomodacion turistico. E asesor no tabata di acuerdo cu un moratorio, es mas, tabata vocifera e idea cu si ta berdad cu nos tin un deficit den nos fondonan di AZV y SVb, anto e miho manera pa resolve esey ta pa laga un grupo grandi di empleado stranhero drenta, pa conhuntamente nan por yuda nos resolve nos problemanan cu e dos fondonan, cu nan contribucion na e fondonan ey tur luna…

Seguidamente, e no kier a ni scucha e argumento cu, por ehemplo den e caso di AZV, un empleado di salario minimo apenas por tabata, y ta, contribui 40 o 50 florin na e fondonan, mientras cu e costonan medico pa persona, y no ta tur hende ta contribui, ta core den careda di 3000 florin pa aña… Igualmente den e caso di SVb, un persona ta drenta cu 45 aña, ta bay cu ‘pension’ despues di un periodo relativamente cortico, no por bolbe pa su pais, pasobra e famia aya ta mas pober cu e mes, pues e ta keda aki. Cu e par di cien florin cu e ta haya e no por biba, y ta termina na merced di caridad, priva o di gobierno den forma di algun asistencia di emergencia. Pa nos cara nos no por laga ningun hende muri riba caya, anto nos lo mester pone placa pa atende e casonan aki, cu lo ta creciendo den e proximo 10 o 20 aña.

Y ta ken lo mester paga tur esey? E amable asesor tabatin e ‘amabilidad’ ainda di bisa cu esey no ta e problema pa awor, den estilo di ‘we will see when we get there’ confirmando de paso algun sospecho cu nos tabatin caba tocante e ‘vision a largo plazo’ cu supuestamente e gobernante en general, y por lo tanto e asesornan mester tin. “Regeren is vooruitzien” ta un expresion cu ta caracterisa e manera di pensa y opera di nos madre patria. No cu esey ta conta pa tur cos, den tur situacion, pasobra aya tambe e hamber politico pa un ‘score facil’ orienta riba corto plazo so, no sa falta. Sin embargo, sigur ora ta trata den ki direccion e pais mester bay den futuro mas distante, tin gran sentido di consenso y coherencia den nan pensamento.

Den nos situacion, lamentablemente, ta parce cu lo contrario ta domina. Ta parce cu tin un consenso, sigur cerca e partidonan grandi cu a domina e scenario politico di prome cu, y tambe despues di 1986, cu exito instantaneo ta e cos mas importante cu tin. Pero, algun observador atento lo bisa, nan tur a brasa, te casi sofoca, ideanan bunita encuanto ‘desaroyo sostenible’ y cada biaha cu bin un iniciativa pa pidi nos atencion pa e peligronan di crecemento excesivo, nan ta core ‘join’ y declara cu nan ta completamente di acuerdo, y cu nan si ta bay percura pa crecemento balansa, y un hala di otro palabra prometedor cu nos no ta bay ripiti aki… Esey ta berdad, pero manera semper ta e caso, nos no por huzga ningun competidor politico pa su palabranan, pero mester observa semper e actonan. Manera un bon defensa den futbol no ta enfoca riba tur e ‘schijnbeweging’ cu e contrincante ta haci, pero ta concentra riba unda e bala ta move finalmente, asina pa nos tambe ta importante enfoca no riba loke nan ta papia y priminti, pero riba loke nan ta haci.

Sin embargo, por surgi otro critica cu ta parce hustifica, cu Aruba tin desempleo y mester di actividad economico pa impulsa crecemento economico. Si, Aruba tin cierto desempleo, pero nos a puntra nos mes si creando miles di trabao di drecha cama y laba baño, no cu nos ta menosprecia e trabao riba su mes, tur trabao ta digno, pero hecho ta cu di baina nos ta haya nos propio hendenan traha e tipo di trabao aki. Y esey ta trece nos automaticamente ariba e tema di importacion di trahador pasobra si no, e tipo di actividad economico aki no por opera.

Kico ta bira e consecuencia? Cu e empresa ta gana su placa suavemente, mientras cu e comunidad aki mester lidia cu e consecuencianan: mas vivienda, mas caretera, mas scol, mas servicio publico y priva, mas… tur cos. Un dado momento Aruba lo ta yegando na un poblacion di e tamaño di Curaçao, cu menos di mita di e superficie. Di berdad nos ta purba yega na 700, 800 o mas habitante pa kilometro cuadra? Nos ta caba den algun ‘ranking’ dudoso mundial, manera esun di obesidad. Ta solamente den categoria negativo nos kier competi? Ta di lamenta cu e cosnan aki ta bay asina, pasobra nos sa cu tin hopi ciudadano cu ta mira e peligronan aki, pero nos no sa si nan ta mayoria…

 

You May Also Like

Exito di Filomena College casualidad? Sigur cu no…

Cos bon ta sucede ora hende cu ta dispuesto di traha duro y no ...

editorial

Con ta para cu nos infraestructura? Cuanto caminda falta pa drecha

Den propaganda gubernamental semper ta papia solamente di e proyectonan grandi cu ta na ...

editorial 2_15_1.jpg

Ministro ta ‘bezig’ Pero no por duna niun fecha

E actuacion di e ministro encarga cu Asunto Economico, Energia, Telecomunicacion y Medio Ambiente ...

Biahenan di propaganda

Sorprendente cuanto comentario e bishita reciente na Colombia di nos prome ministro no a ...

Parlamento ta cuestiona costo excesivo di hospital

E reunion di parlamento ayera a trece en berdad algo di e ambiente parlamentario ...

Historia ta ripiti? O nada no a cambia…?

Nos mester admiti cu nos mes no sa bolbe tanto na e archivo extenso ...