Ayera Ministerio Publico a anuncia un proyecto nobo di enkelband pa sospechosonan hoben den cooperacion cu Stichting Reclassering en Jeugdbescherming Aruba. E proyecto aki ta yama ‘Vigilancia Electronico ora di Suspension di Detencion Preventivo’ y ta un esfuerso pa “limita e consecuencianan negativo cu detencion por tin pa un sospechoso hoben,” OM a bisa den su anuncio.
Manera e instituto a splica, e proyecto piloto ta dirigi riba hobennan di 12 pa 23 aña di ken nan detencion por ser suspendi den acuerdo cu conseho di Reclassering. Cu e enkelband, autoridadnan por tin supervision riba sospechosonan sin cu mester impone condicionnan extremo cu por stroba of tin otro consecuencia negativo riba e hoben. Sospechosonan hoben cu ser obliga pa bisti enkelband lo por keda bay scol, traha of ricibi guia profesional, sinembargo te cierto limite.
E enkelband lo sirbi mas como un prueba pa e hobennan aki, cu cual autoridadnan lo controla si un sospechoso por tene su mes na condicionnan estableci pa hues, mientras e ta spera den libertad pa su caso ser trata.
Estudionan conduci pa ambos Oficina di Husticia Hubenil y Prevencion di Delincuencia na Merca (OJJDP) y Departamento di Husticia na Merca (DOJ) a mustra cu uso di enkelband como supervision digital por tin varios beneficio pa hobennan sospechoso y hasta pa comunidad. Esakinan ta inclui:
- Preveni efectonan negativo riba ambiente di e hoben: E estudionan ta splica cu detencion tradicional di un hoben por trece consecuencianan negativo, specialmente pa nan relacion familiar, educacion y oportunidad den mercado laboral. Por medio di implementa un programa di enkelband, e hobennan por keda den contacto cerca cu su ambiente mientras e ta warda pa su caso ser trata. Esaki na su turno ta sigura un miho trayecto di rehabilitacion pa e sospechoso, ya cu e no lo ser kita for di su rutina diario of servicionan di sosten mientras e ta tuma responsabilidad.
- Menos gasto pa comunidad: Manteniendo un hoben deteni den centro di detencion hubenil usualmente ta mas caro compara cu supervisa e sospechoso den comunidad via monitoreo digital. Den centronan di detencion, placa di belasting lo mester paga pa e sospechoso su cuminda, awa cu e ta bebe y usa y mantencion di facilidad y pago pa (mas) personal. Uso di enkelband ta corta e costonan aki significantemente. Es mas, un estudio conduci pa OJJDP a hasta sugeri cu hobennan cu ta traha por paga pa nan enkelband.
- Preveni sobrepoblacion den centronan y mantene hobennan safe. Uso di enkelband pa controla sospechosonan en bes di detencion tradicional tambe por alivia sobrepoblacion den centro di detencion hubenil. Alabes e por sigura cu e sospechoso no lo ser influencia pa otro detenidonan of cay victima di posible comportamento hostil di otronan den e centro.
Na otro banda, uso di enkelband no ta garantisa rehabilitacion completo, y posibilidad di un ripiticion di comportamento criminal ta keda un riesgo. Hobennan por hasta sigui comete crimen mientras nan tin enkelband bisti, pues riba su mes e no ta sigura monitoreo estricto. Pa preveni esaki ta importante pa autoridadnan ta estricto den con nan ta monitoria e sospechoso; Si e sospechoso ta bay scol y/of ta traha, mester tin otro punto di referencia pa confirma nan presencia, manera maestro of gerente di trabao etc.
Tambe ta importante pa autoridadnan brinda oportunidadnan pa hobennan sospechoso por tin un rehabilitacion exitoso. Esaki ta inclui programanan dirigi pa mehora comportamento of mentalidad di e sospechoso, via terapia, programanan educacional, sosten familiar etc.
Pues uso di enkelband ta un alternativo miho ora e ser acompaña cu afspraaknan cla, monitoreo di cerca y iniciativa di instancianan pa amplia oportunidad pa e hobennan sospechoso aki por tin un rehabilitacion exitoso.
OM a splica cu Stichting Reclassering ta encarga cu monitoreo di e sospechosonan, percurando pa nan cumpli cu condicionnan stipula. E instituto na su turno ta reporta directamente na OM tocante e trayecto di e sospechoso. Si e sospechoso viola su condicionnan, Ministerio Publico por dicidi pa pidi hues termina e Vigiliancia Electronico di e hoben.
Durante e periodo di supervision electronico, e sospechoso mester keda cas na e adres registra, cu excepcion di palabracionnan di antemano, manera ora e ta sali pa bay scol of trabao. Por tin condicionnan adicional tambe; por ehempel si un hoben tin cu meld su mes na Reclassering, tin cu mantene su mes na un prohibicion di contacto of na un obligacion pa sigui tratamento.
Dia prome di februari 2027 lo evalua progreso di e proyecto piloto aki.
