casino ex aurora reunion

 

Minister Paul Croes (AVP) di Labor a anuncia cu otro siman lo firma e acuerdo cu e operador nobo pe casino ex Aurora den e hotel Occidental. E no kier divulga e nomber ainda.
Pero si e ta bisa cu tur 44 trahado lo haya nan trabou bek.

Aki bou por lesa e relato oficial cu e minister a manda pa prensa:

 

A haya operador nobo pa Aura Casino y tur empleado ta bek cu nan beneficionan

Diaranson mainta Minister di Labor, Paul Croes a haci e anuncio grato e importante aki for di su oficina. E confirmacion a bin directamente for di Gerente General di Barcelo, Sr. Lorenso Rubio y despues di aproximadamente un luna,  Minister Paul Croes, hunto cu Mediador di Gobierno, Departamento di Labor y sindicato FTA a traha deligentemente pa logra e reapertura. “Nos sa cu tabata un situacion hopi dificil pa 44 trahador… y nos a convivi na tur momento cu tur e trahadornan,” Minister Croes a bisa. Na comienso di proximo siman ta bay realisa e firma oficial di e acuerdo y anuncio di nomber di e operador nobo pa ex-Aura Casino.

Negociacionnan a tuma su debido tempo ya cu ta inclui multiple aspecto manera traspaso, renobacion , y naturalmente e deliberacionnan. E titular di labor a gradici enormemente e esfuersonan haci pa tur partido envolvi. Tambe a gradici gerencia di Barcelo, cu tambe a move diligentemente pa haya un operador nobo den e menos tempo posibel y respetando nos leynan laboral.

“Bo no kier pa sosode loke a sosode den pasado caminda ta bin un operador nobo cu no ta bay cumpli cu e trahadornan of kizas cu tin un situacion financiero instabiel,” asina e mandatario a indica. Pesey a asumi e responsabilidad di tuma tempo pa yega na e operador nobo.
Esaki ta a base di cambio den ley laboral cu colega Minister Oduber a percura p’e na 2013. Ora cu un compania ta cera y ta wordo tuma dor di otro compania, e compania nobo ta tuma tur lusten y lasten. Como tal e operador nobo pa ex Aura Casino a cumpli y lo tuma tur 44 trahador bek den servicio, sin cu nan ta perde e beneficionan cu a adkiri manera aña di servicio, salario y otronan.
“E grato noticia a bin na un momento crucial. Nos sa cu e situacion financiero di cada un di e trahadonan tabata yegando su limite,” Minister Croes a expresa. “Algun a haya un empleo temporal pa sobrevivi e periodo di incertidumbre, pero un bes mas, nos por ta contento.”

LEAVE A REPLY

Please enter your comment!
Please enter your name here