A tuma 4 dia pa e barco R/V Hydra localisa naufragionan cerca di Aruba su costa na localidadnan cu nunca antes a identifica – un descubrimento cu ta rapidamente birando un di e resultadonan mas impactante di un proyecto internacional nobo pa crea un mapa y proteha Aruba su herencia cultural bao awa.

E descubrimento aki ta parti di un colaboracion mas amplio cu ta uni Aruba su Museo Arqueologico Nacional Aruba (MANA), Imagination for Development and the Nature of Values Aruba (IDNOVA), Aruba Conservation Foundation (ACF), y e organisacion marino internacional Inkfish LLC, ken su barco di investigacion R/V Hydra a yega costa di Aruba den fin di augustus.

Minister di Cultura, Mike Eman, a firma un MoU cu ta sostene e colaboracion, garantisando cu tur data cientifico colecta durante e investigacion keda disponibel pa Aruba como un fuente nacional pa investigacion futuro, educacion y maneho di herencia.

Kico e proyecto aki ta

Naufragio y otro herencia cultural bao awa ta conta e storia di Aruba su pasado maritimo, for di comercio internacional te migracion y eventonan di tempo di guera. E proyecto ta sigui mas di 2 decada di trabao: na 1999, arkeologo di MANA Raymundo Dijkhoff a cuminsa construi e rednan cientifico y colecta e informacion cu a forma e base di Aruba su investigacion di herencia bao awa. Un inventario inicial di sitionan bao awa a cuminsa na 2011, y na 2019 Aruba, Corsou y Sint Maartne conhuntamente a pidi Hulanda pa ratifica e UNESCO 201 Convention on the Protection of the Underwater Cultural Heritage – un cuadro internacional cu ta encurasha paisnan proteha sitionab bao awa, evita kita obhetonan innecesariamente y coopera via investigacion y training. Ratificacion ta plania pa bini den e añanan binidero, y e expedicion actual ta sigui e Convenio su principionan prome cu e ratificacion formal mes.

Na november di 2025 e impulso a aumenta ora cu Agencia di Herencia Cultural di Hulanda (RCE) a train profesionalnan na Aruba, usando metodonan reconoci internacionalmente di UNESCO pa documentacion y proteccion di sitionan bao awa. Arkeologo di MANA Harold Kelly y Oriana Wouters di IDNOVA ta representando Aruba den e training aki, cual despues a pone den practica via documentacion di San Nicolas Baai, un di Aruba su panorama maritimo historico mas importante, y un evaluacion nobo di SS Pedernales, ehecuta cu buceadornan local y esnan den comunidad cu ta carga herencia.

R/V Hydra ta un plataforma flotador cientifico opera pa Inkfish LLC, un organisacion filantropico cu ta financia ciencia den ocean via barconan o plataformanan flotador di investigacion avansa, mapping technology y expedicion multidisciplinario. E expedicion, cual lo core for di 25 di augustus te 15 di september 2026, ta completamente financia pa Inkfish, dunando Aruba acceso na infrastructura di investigacion multidisciplinario y experticio cu di otro forma e no lo tin.

Abordo tin un ekipo multidisciplinario di alrededor di 48 cientifico, tecnico y specialista cu experticio cu ta cubri ciencia marino, investigacion geospacial, buceo tecnico y otro disciplinanan cientifico, lidera pa lider di e expedicion Matt Carter, banda di Hydra su barco di sosten Skye y dos asina yama submersible di investigacion cu tin capacidad di opera na un profundidad di 1.000 meter. E barco su centerpiece ta un sistema di sonar cu capacidad di crea un mapa na profundidad di 2.500 meter, mandando ola di zonido na e vloer di ocean, construyendo mapa tridimensional for di e señal cu ta regresa.

Descubrimento di naufragio

E resultado mas significante te cu awo a surgi dianan despues di e comienso di e expedicion. Mientras tabata creando e mapa na areanan cerca di Aruba su costa – cu Skye nabegando awanan menos profundo na mesun tempo na otro banda di e costa – Hydra su sonar a haya anomalia cu ta consistente cu naufragio. Algun ta coresponde na sitionan di naufragio conoci, pero otronan tabata señala sitionan cu nunca antes a keda registra como area cu ta contene naufragio mes. Segun e actualisacion mas reciente, e cantidad exacto di naufragio recientemente identifica y e identidad di e barconan involucra te ainda no a keda revela.

E distincion aki ta loke ta haci e descubrimento aki notabel. Aruba su awanan ya caba ta cas di algun naufragio bon documenta cu ta central na su turismo di buceo y historia maritimo, manera SS Antilla y Jane Sea. Sinembargo localisa naufragio na sitionan cu investigadornan no a wak ta expande, di un manera directo, kico realmente ta conoci tocante e vloer di ocean rond di e isla.

Cada naufragio no identifica ta data nobo cu posiblemente lo conta un storia nobo di Aruba su pasado maritimo – un barco cu por ta conecta na rutanan di comercio, migracion, actividad di guera of accident cu nunca antes a mira den archivonan local. Localisa nan tambe ta e prome paso necesario den direccion di eventualmente proteha nan: un sitio no por ta proteha, monitorea pa hortamento of daño, of poni bao consideracion pa investigacion futuro of pa acceso publico cu cautela, te ora cu su existencia y localidad ta documenta.

E velocidad di e descubrimento ta bisa mesun hopi tocante e tecnologia como e resultado mes. Sonar ‘multi-beam’ cu capacidad di yega te 2.500 meter ta permiti investigadornan mira un area sumamente grandi den dianan na luga di e varios aña di trabao cu e lo tuma usando metodonan mas tradicional so – trabao cu lo ta specialmente dificil, y den cierto luga te hasta imposibel, mirando cu uso di buceadornan so por ehempel ta trece un limite di profundidad.

E capacidad aki ta precisamente dicon e partnership aki ta carga un importancia particular pa Aruba specificamente: e ta exactamente e tipo di capacidad di crea mapa den escala grandi cu e isla no tin di su mes, pero cu awo ta desplega y documenta pa Aruba su uso futuro.

E ekipo no solamente ta buscando lo desconoci; tambe e ta reexaminando loke ya caba ta conoci. Despues di buceo di test na Jane Sea y area di Arashi, buceadornan a bay SS Antilla usando scooter bao awa cu camara, creando un model virtual tridimensional completo di e naufragio. E model aki ta laga investigadornan mira si tin buraco den nan imagen, dicidi si mas buceo ta necesario como follow-up y evalua e naufragio su alrededor ecologico y deterioro fisico den tempo – convertiendo un sitio popular pa buceo den un record cientifico andando na luga di un atraccion turistico so.

Mas aleu cu arkeologia, un proyecto di conservacion tambe

E expedicion ta bay mas aleu cu naufragio. Banda di creacion di mapa arkeologico, cientificonan ta colecta tambe DNA of eDNA ambiental – material genetico cu organismonan por laga atras – pa studia pisca, biodiversidad y e presencia di patogeno asocia cu rif cerca di e sitionan aki sin mester di captura ningun organismo directamente.

E combinacion aki di investigacion arkeologico y ecologico a duna Aruba un imagen mas completo di ambos su herencia cultural bao awa y e salud di e ambiente marino rond di esaki, conectando proteccion di herencia directamente na conservacion di e ecosistemanan cu ta depende riba y ta crece rond di e mesun naufragionan aki.

Mas aleu cu e descubrimento mes, e proyecto aki ta un inversion den Aruba su futuro capacidad di investigacion. Kelly y Wouters ta trahando directamente banda di e ekipo internacional di ciencia durante e expedicion, garantisando cu experticio y conocemento tecnico lo keda riba e isla na momento cu Hydra bay.

Pa motibo cu tur e data colecta ta keda disponibel pa Aruba bao e acuerdo firma, e resultado lo ta util pa investigacion den futuro, educacion y maneho di herencia te hasta despues cu e expedicion caba, na luga di bay cu e barco cu a haya nan.

Cu alrededor di 2 siman restando, MANA y Inkfish lo sigui nan trabao na costa di Aruba y lo comparti actualisacion regular tocante mas di loke tin bao Aruba su awanan teritorial.