Home Local Oposicion AVP: si mester lo bin accion contra plan DPS

Oposicion AVP: si mester lo bin accion contra plan DPS

432
Parlamentario Arthur Dowers

Ya caba sindicato SEPPA a yega di expresa nan malcontento riba independisacion di Dienst Publieke Scholen (DPS) pa un fundacion. Entre otro riba e pensamento di minister di Enseñansa pa tur hende bay over. Kiermen esunnan cu ta docente, pero tambe esunnan cu no ta docente.

Ayera parlamentario di oposicion AVP, Arthur Dowers no a descarta cu lo bin un accion den caminda dilanti di Bestuurskantoor. Esaki considerando e malcontento cu tin den comunidad riba e cambio cu gobierno kier introduci den scol publico (DPS), y e forma con e minister di Enseñansa kier bin cu e cambionan aki.

Mi ta kere cu na momento cu bo tin gobernantenan terco y dictador, y mi ta kere tambe gañado, e unico contesta cu bo por duna nan ta mustra nan cu bo ta serio”. Segun sr. Dowers, un di e formanan cu nan ta compronde ta presenta dilanti di Bestuurskantoor y bisa nan: tende recapacita!

E no ta sinti cu un accion ta necesario. Pero si den caso cu e ta necesario, sigur e lo bay tuma luga. Esaki ta e señal cu e parlamentario kier manda minister di Enseñansa, Rudy Lampe (RED).

Ex minister Dowers a bisa cu nan no lo bay ‘kima auto’ manera den pasado e mandatario actual di Enseñansa a yega di hacie . Tampoco nan no ta bay instiga ningun hende pa uza violencia. Pero si nan ta bay manda un señal pa hala atras su intencion di converti DPS den un fundacion. Sino e ta bay haya confrontacion cu esunnan cu no ta di acuerdo cu esaki. Nan lo keda pendiente pa wak si minister Lampe lo recapacita of no riba su decision.

Cambio di director
Sr. Dowers kende a fungi como minister di Enseñansa den e gabinete Mike Eman I a laga sa cu den un ‘forma dictatorial’ e minister actual kier bira DPS den un fundacion. Te hasta a manda su director cas bou e excuus cu e director mes a dicidi di bay. Mientras cu e director di DPS a bisa cu e no por defende un maneho sin base, y pretende despues di defende pa e cosnan cu no ta berdad.

Awor nan a nombra un miembro di nan partido pa asumi e posicion aki, segun e parlamentario. E ta haya cu mester bin mas claridad riba e nombramento aki, y tambe ki cualificacion e persona encarga tin pa guia e proceso di converti DPS den un fundacion.

E parlamentario di e fraccion AVP a indica cu nan no tin problema si nan ta bin cu un persona experto cu a traha hopi tempo den e departamento di enseñansa pa e funcion aki. Pero no djis hisa benta un persona pa kita esun cu ta como hefe actualmente y busca un amigo di partido. Tabata mas transparente y menos politico pa e mandatario bin cu un solicitud habri pa e posicion aki di hefe di un departamento asina grandi y importante manera DPS ta.

E ta haya cu e meta principal di e tipo di cambio aki ta cu e minister Lampe kier pone su amigonan den posicion clave pa haci uzo di nan, ora cu e tin mester di nan. E ta haya cu e docentenan a cuminsa realisa kico ta e ‘plan diabolico’ di sr. Lampe ta. E ta haya cu e docentenan a cuminsa rechasa y bisa no contra e cambio aki. Pero e ta kere cu mas hende mester bisa no. No solamente docentenan sino pueblo en general tambe.

El a splica cu na momento cu un mucha ta wordo saca di tur scol, e por yega na porta di gobierno of instancia publico concerni pa tin acceso na e scol publico aki. Pero na momento cu e mandatario actual di Enseñansa kier entrega scol publico ‘na su gang of brother nan’ no lo tin mas scol publico.

Mientras cu e mucha ta wordo perhudica, ya cu ningun fundacion di enseñansa no kier dun’e un oportunidad mas. Esaki ta inaceptabel y sr. Dowers ta kere cu e señal aki a wordo manda caba pa minister di Enseñansa. E ta haya cu cada biaha cu e mandatario ta wordo confronta pa kico e kier bin cu e cambio aki, e ta cambia su opinion y vision.