Un grupo forma pa ocho organisacion opositor di Nicaragua a publica ayera su proposicion di reforma electoral ‘pa recupera e transparencia y participacion ciudadano’, cu obhetivo di evita mas presidente manera Daniel Ortega, ken nan ta considera como ‘un dictador’.

E proposicion ta busca ‘reestablece e transparencia, garantia electoral y promove un efectivo inclusion y participacion ciudadano’, cu ta inclui voto for di exterior, e organisacionnan di forma conhunto a indica.

Di acuerdo cu oposicion, un serie di eleccionnan fraudulento supuestamente, den cual tur Poder di Estado a colabora, a permiti cu Ortega ta sigui na poder desde 2007.

Nicaragua tin eleccion na fin di aña 2021, sinembargo, e pais ta atravesa un crisis, pa loke sectornan nacional y internacional ta recomenda adelanta e eleccion, algo cu Ortega a interpreta como intento di golpi di estado.

E opositornan, cu te awor tin proposicionnan individual riba e reforma electoral na Nicaragua, a resumi nan proposicion den un unico lista di ocho punto.

Tambe nan a plantia cu lo tin cu publica tur regulacion di e proceso electoral, durante e convocatorio di eleccion.

E propuesta a ser elabora pa varios movemento di oposicion Alianza Civico pa Husticia y Democracia, Unidad Nacional Azul y Blanco, Consejo Superior de la Empresa Privada, Grupo Pro Reforma Electoral, y partidonan Ciudadanos por la Libertad, Yatama, Partido Liberal Constitucionalista (PLI), y Partido de Restauración Democrática (PRD).

Desde e explosion popular contra Ortega, na april di 2018, Nicaragua ta biba un crisis socio- politico cu a laga centenares di morto, detenido of desaparecido, miles di persona herida y decena di miles na exilio.