‘Orguyoso di sa ken mi ta y di unda mi ta bin’

Natusha Croes

Durante un entrevista exclusivo cu Bon Dia Aruba e artista multi-disciplinario Natusha Croes ta conta nos di su trayectorio y inspiracion como artista. E poeta/musico/artista audiovisual lo presenta un obra interactivo na Cas di Cultura diabierna proximo titula Tactus.

Esaki ta un continuacion di e entrevista cu sra. Croes. E ultimo topico cu nos a toca ta kico e artista lo kier haci siguientemente ora e presentacion na Cas di Cultura wordo finalisa.

Bo tin un idea na unda bo lo kier bay?
“Mi ta considerando haci un Masters pero alabes mi no ta sigur si esey mi kier di berdad. Mi kier keda na Aruba pero mi no por.”

Dicon bo ta bisa cu bo no por keda na Aruba?
“Pasobra mi ta haya cu tur cos creativamente ta muri si mi keda kinan. Mi ta sinti cu si mi no alimenta e creatividad e no por crece. E mester un stimulante of ambiente specifico. Como artista na Aruba bo ta sacrifica hopi pa keda kinan. Pero sigur ora bo sali bo lo haya un trek pa bo bin bek. Por ehempel ora mi tabata na Berlin ya riba e prome dia mi tabata sinti cu palabranan ta saliendo di mi cu mi no a anticipa. Y na Aruba mi ta echt sinti casi di un manera deprimi. Bo tin cu bin na un compromiso cu bo carera pa por paga e cuentanan ora bo ta artista. ”

Den exterior bo ta haya menos presion pa paga e cuentanan? Of con e ta hinca den otro si na Aruba e ta mas dificil?
“Na Aruba mi ta kere e ideal ta, si mi por pone flat: cu bo ta reuni placa pa bo por bay sali afo pa 3 luna como artista y haci bo research. Bo tin cu haci hopi strategia. Pero si bo no ta estableci un caminda bo tin cu determina unda bo ta bay produci placa pa por bay riba un residencia di arte y despues bolbe y sigui e ciclo aki. Esey ta e ciclo cu ami a experiencia. Sigur e ta rekiri cierto maniobranan acrobatico ora bo tin cu tapa buraconan den presupuesto den exterior. Y tambe drenta periodonan hodido unda bo no tin placa y bo no por haci nada ta parti di e proceso. Pero esaki mi ta kere mester cambia pasobra e ta hopi exhausivo. Pero mi no por dunabo un contesta concreto riba unda mi lo bay den futuro.”

Nos a cuminsa e entrevista ora bo a describi cu bo kier bin cu instrumentonan nobo. Di unda e interes of obsesion aki a bin?
E ta algo hopi personal con mi a bay riba e caminda aki di crea muziek uzando metodonan poco convencional. Mi a sinti na cierto momento cu mi a haci uzo di tur e disciplinanan artistico pero nunca mi a uza zonido of muziek. Mi tabatin un poco miedo pasobra mi tata tabata hopi conoci como musico y mi no kier a compara mi mes cu ne. Ni tampoco crea un expectativa di mi mes como musico. Mi no tabata kier esey. Dus pa mi tabata importante pa busca completamente otro building blocks pa asina podera mi mes den e medio aki di mi mesun manera. Pero tambe e accion envolvi den e creacion di e zonido mi ta haya interesante. E ta un reto pa envolve mi mes den e proceso di con e zonido ta wordo crea mas aleu cu djis primi un boton riba e computer. ”

Kico e publico por spera di e evento? Kico ta diferente di dje?
“Mi ta kere e ta algo hopi alternativo aki na Aruba y cu hopi hende no a yega di experiencia antes. Posibelmente nan a bay New York of Berlin, etc. y nan a presencia algo asina pero mayoria di hende no a yega di experiencia un performance di estilo mas moderno. Sigur ora e ta envolve mas cu un disciplina y ta mas interactivo. E tipo di produccionnan aki multidisciplinario y interactivo aki ta den minoria. Pues pa medio di presencia e evento aki bo ta aportando na algo cu no solamente ta un concierto pero ta un experiencia visual, poetico, etc.”

Dus bo kier pa produccionnan multidisciplinario bira mas comun tambe. Bo conoce mas persona cu ta haciendo esaki of lo bo kier duna un tayer pa fomenta proyectonan asina?

“Sigur mi kier duna un tayer. Mi mes no ta sinti mucho prepara pa tuma e stap ey pero mi a duna un tayer durante mi residencia na Cincinnati. Nan a invita mi pa bay eynan. E intercambio tabata encera cu nan ta duna mi e espacio pa mi haci mi research y mi performance pero a cambio di duna les na e comunidad. E tabata algo hopi placentero. Mi ta kere bo mes ta pensa hopi biaha cu bo no ta apto pa duna un tayer pero bo tin mas pa siña otro hende di loke bo ta kere. Despues di 3 aña haciendo performance mi ta sinti mucho mas comfortabel pa duna un tayer y mi lo considera esaki sigur.”

Kico ta e temanan cu bo ta trata den bo practica artistico? Of kico ta bo mensahe?
E palabra existencial ta surgi hopi ora hende puntra mi esaki. Mi no ta kere e ta bay over di mi si no kico nos ta comparti como hende. Semper e ta bin for di mi pero semper mi ta consciente pa duna espacio pa e otro persona of publico duna algo bek. Mi ta pone hopi enfasis riba e interaccion. Kico ta haci nos humano, kico ta haci nos sinti, dicon nos ta sinti asina hopi, di unda nos ta, pakico nos ta. E ta algo hopi filosofico pero semper e ta bin di e intento pa puntra ken ami ta, ken abo ta y ken nos tur ta hunto. E resto di dje ta poesia.” (ta hari).

Mi ta kere e ta evidente tambe ora bo papia di e experiencia di crece na Aruba, cual obviamente bo ta comparti cu hopi hende. Por ehempel bo ta menciona kiniki y otro elementonan similar.
“Si. Mi kier crea un memory lane cu nos tur por relaciona cu ne. No ta importa si bo tabata na banda links of banda rechts di e memory lane nos tur ta relaciona bek na e flashbacks aki. E sintimento cu bo tin ora bo ta pensa cu wow, solamente pa via di crece na Aruba mi por a bira ken mi ta awe. Mi ta pon’e den un mitologia pero e ta necesario mi ta kere. E ta parti di ken bo ta, dicon bo ta orguyoso pa sa ken bo ta y kico ta wanta bo na bida. ”

Tactus ta un obra cu lo wordo presenta riba 17 di november na Cas di Cultura. Lo tin dos actuacion: un pa 6or di atardi y un pa 8or di anochi. Tin mas o menos 100 luga pa cada actuacion. Carchi ta obtenibel na Cas di Cultura, Unoca, Checkpoint Color of na e artista ( 562-3217). E actuacion ta apto pa audiencia di tur edad, segun e artista ta informa.

You May Also Like

Aumento drastico den peticion Venezolano pa extension estadia turistico

Den 2016 Dimas a registra un bahada leve pa locual ta trata e peticionnan ...

Problema huma WEB -Barcadera no ta soluciona completo

E problema di huma di substancianan acido cu ta causa molester na e waf ...

Dianan di vakantie lo cambia pa aña escolar 2019 -2020

ORANJESTAD – E calendario escolar pa aña 2019-2020 a ser cambia pa enseñansa, e ...

ocean z.jpg

“Zissu posiblemente enfrentando multa di 300 mil florin”

E medida di ordo cu tabatin na luna di december tabata dirigi riba Zissu, ...

Fundacion Rancho preocupa cu desaroyo di proyecto Habor House

Clifford Rosa como presidente di fundacion Rancho ta vocifera su preocupacion cu e ultimo ...

Ainda tin diferencia di genero riba pago di salario

A pesar cu nos ta na aña 2018,  ainda tin obhetivo nan pa logra ...