Recientemente, un hoben Arubiano, Oriana Mansur a ricibi e prestigioso premio “Rising Star Award” di Women’s Bond Club, durante un evento organisa na New York, Merca.
Tur aña, Women’s Bond Club ta reconoce “rising stars” femenino di henter e sector financiero di Merca. Ta duna e reconocemento aki na profesionalnan emergente cu ta destaca pa nan talento, liderazgo, dedicacion y impacto den sector financiero.
Tambe Women’s Bond Club ta duna diferente beca. Funda na 1921, e organisacion ta uno hopi respeta den mundo financiero di New York. Su meta ta pa empodera hende muher, promove liderazgo y crea oportunidad di crecemento profesional.
Ademas di un logro profesional, e premio aki tambe ta un reconocemento pa Oriana su añanan di trabao duro, perseverancia y compromiso den un sector competitivo. Su exito, dedicacion y disciplina ta un inspiracion pa e siguiente generacion di hoben Arubiano pa sigui busca nan soñonan y logra nan meta.
Aruba por ta orguyoso di un yiu di tera cu ta sobresali den un mundo competitivo. Pabien Oriana!
