Na su cas cu su famia na su banda, Otmar Oduber a anuncia ayera cu e lo bay lansa su mesun partido. E ex-minister kier bin cu un plataforma pragmatic cu lo mester haya entre 4 y 6 asiento y lo mester bira ‘e forsa nobo’ den politica na Aruba.
Ya desde januari, dia cu Oduber ba bishita gobernador pa anuncia su retiro tentativo, tabatin confirmacion for di e circulo di e politico cu e lo lanta un partido nobo y te hasta cu esaki lo ta cla caba pa ranca sali na cualkier momento. Na dado momento e inicialnan POR a cuminsa circula di boca pa boca. Sinembargo ayera Oduber a duna di conoce cu despues di casi 3 siman di a consulta cu famia, amigo, sostenedonan y votadonan el a tuma e decision di continua den politica activo. E ex-minister di partido AVP tambe a keda sin menciona un nomber of color, bisando cu esakinan lo bay wordo anuncia na comienso di december. Oduber a bisa cu no solamente a papia cu famia y militancia, pero durante e ultimo dos simannan cu a pasa a combersa tambe cu hopi otro hende, incluyendo otro ex-ministernan di Turismo manera Lili Beke y su adversario politico di campaña di 2009, Edison Briesen. Lo a papia riba entre otro e ultimo 7 añanan su tras, decisionnan cu a wordo tuma y a reflexiona riba kico lo cambia of haci diferente si e sigui cu su carera politico. “Na mes momento siña di bo debilidad nan tambe, pasobra ningun hende no ta perfecto den e mundo aki”, Otmar Oduber a bisa. “Mi a consulta y awe mi kier anuncia oficialmente hunto cu mi famia cu un etapa nobo den politica ta habri su porta pa mi persona. Mi lo participa na eleccion 2017 cu un plataforma politico nobo na Aruba. Un forsa nobo pa por trece igualdad pa tur esunnan cu na e momentonan aki ta sinti cu nan no ta haya un bos di gobiernonan cu tabatin y no a haya un representacion di e cantidad di partidonan cu a forma gobiernonan den e ultimo añanan. P’esey mi ta bisa cu e ta un honor pa mi sigui sirbi e comunidad aki cu e mesun gana, ferbor y forsa cu mi a hacie durante e ultimo 19 añanan cu mi tabata riba lista y e 15 añanan den oposicion como Parlamentario y despues como Minister, pa por sigui haci e trabou den nomber di nos comunidad”, segun Otmar Oduber.
Puntonan di salida
E plataforma politico nobo lo bay bira uno pragmatico, pues sin signatura ideologico particular, na unda lo kier enfoca riba siguridad, medio ambiente, educacion y salubridad. Sin duna spicacion specifico riba con lo bay yega na e obhetivonan, Oduber a delinea e prioridadnan cu su partido lo bay tin. El a bisa di kier enfoca riba empleo pa hobennan profesional cu a studia afo y di cual hopi di nan no por regresa pasobra nan no tin oportunidad pa nan. Tambe Oduber ta indica cu e kier crea mas oportunidad pa artistanan local y duna atencion na medio-ambiente, dunando oido na NGO’s pero treciendo esakinan y desaroyadonan mas cerca di otro. Tambe riba programa di e partido nobo por spera plannan fiha riba derechonan di mucha, personanan cu limitacion y nos grandinan. Pa loke ta salubridad kier haci algo riba criterionan di higiena pero tambe e tempo cu mester warda pa un cita cu specialista. “E mundo nos dilanti no por ta uno cu scolnan ta skirbi cu krijt riba un borchi dilanti. Hobennan kier tin un laptop, ipad y ta prefera haya les via di un borchi electronico”, asina Oduber a duna di conoce. Pa loke ta siguridad, e ex mandatario ta bisa cu kier bay na un situacion na unda ‘por biba bek na e forma habri, na e forma cu nos turismo cu ta nos pilar economico no ta sinti su mes menasa.”
