Luna di Augustus tabata un luna hopi exitoso caminda Aruba su nomber a rezona den varios ocasión ariba nivel internacionalmente. Den mundo di beyeza, señorita Alexia Chin, a representa Aruba den e concurso Miss Internacional de los Mares y del Turismo na Costa Rica y a logra varios premio, incluyendo e titulo maximo. Den un entrevista cu Bon Dia Aruba, Alexia ta conta di su preparacion y experiencia den e certamen.

Alexia a drenta e mundo di beyesa apenas 2 aña pasa cu su prome participacion den e certamen local Miss Youth Aruba. Den e certamen aki Alexia a logra sali 4th runner up y inmediatamente su preparacion pa su concurso internacional a cuminsa. “Mi preparacion a cuminsa for di aña pasa, ya cu eigenlijk mi mester a bay aña pasa na mei pa e concurso, pero door di e pandemia a wordo hala pa e ana aki”, el a bisa.

“Ami tabata completamente prepara caba, mi a train na Merca pasarela, mi a bay Orlando pa un siman den february y eynan nos training a cuminsa, y dia ey mi a keda train duru y te dia di awe mi nunca a stop di train. E preparacion tabata hopi duro pero e tabata hopi worth it tambe. ”, Alexia ta conta.

Aunke aña pasa e concurso na Costa Rica a wordo hala, Alexia a haya e oportunidad pa representa Aruba toch aña pasa den un consurso online, Reina Virtual internacional. Den un total di 20 diferente pais Alexia a logra conkista e titulo di 1st runner-up.

Di su pariticpacion y expereincia na Costa Rica Alexia ta conta; “Aworaki cu mi a bay Costa Rica e tabata un experiencia unico, mi a siña masha hopi mes, mi a crece hopi manera persona y mi a cera amistadnan nobo. E tabata un experiencia hopi dushi cu mi ta gradici Dios cu mi por a pasa aden”.

Entre un total di cuatro pais, Mexico, Costa Rica, Brazil y Aruba, Alexia a logra conkista tur titulo den su categoria. Durante e anochi di premiacion di Fashion y Costume, el a logra gana e premionan di Miss Modelo, Best Body, Best Costume y Best Fashion. Y durante e anochi final el a logra e corona maximo di Miss Internacional de los Mares y del Turismo 2021.

Manera tur reina di beyesa, e team tras di Alexia tabata un parti crucial durante su preparacion y durante e concurso mes. “Mi team ta consisti mas tanto di e comision di Miss Youth Aruba, pero fuera di e comission di Miss Youth Aruba mi tabatin mi make-up artist cu tabata Roberto Avalo di The Salon, y mi diseñador tabata Rodolfo Avalo di The Salon, cu mi ta cu nan tambe desde 2 ana pasa cu mi a participa den Miss Youth Aruba”, Alexia a bisa. “Y mi mayornan tambe ta parti di mi team. Kiermen nos conoce otro y di dos aña caba nos ta preparando”.

Por ultimo senorita Alexia ta duna su mensahe pa hubnetud di Aruba. “Algo cu mi a siña den e certamen aki ta cu bo nunca mester give up, semper bo mester logra bo soñonan, tur soño cu bo tin bo mester bay pe y nunca give up. Ami dos biaha mi a competi den concurso y mi no a gana, pero esey no kiermen cu nunca bo no por gana. Bo mester djis sigui cu bo soño y nunca give up y bo ta bay logre”.

LEAVE A REPLY

Please enter your comment!
Please enter your name here