Accion trahado casino Fta (1).jpg

Trahadonan di Aura Casino representa pa sindicato FTA a dicidi lanta tempran y bay vocifera nan mal contento dilanti sede di gobierno.

Nan tabata un grupo di mas cu 30 trahado kendenan cu borchinan den man a expresa nan preocupacion y disgusto ya cu nan tin tres luna sin traha y sin salario. Mientras cu di otro banda no tin un acuerdo ainda pa e casino lo cuminsa opera, aunke tin varios interesadonan.

Gobierno mas fuerte

Presidente di FTA, sr. Hubert Dirksz a declara na Bon Dia Aruba cu e trahadonan kier mas claridad riba kende ta e operador nobo.  E situacion cu ainda e casino aki no a habri ta trece un consecuencia grandi cerca e trahadonan y nan famia, asina e lider sindical a bisa. 

P’esey e trahadonan a bay protesta dilanti di Oficina di Gobernacion, ya cu nan ta kere cu gobierno mester hunga un rol mas fuerte y decisivo y yuda pa e trahadonan di casino aki lo ta bek na pia di trabou, mas pronto cu ta posibel.

Recientemente gerencia di hotel BarcelĂł (Occidental Hotel) a informa gobierno y sindicato cu nan tin un operador masha interesa pa tuma e rienda di e casino aki cu a cera su porta na luna di december ultimo.

Operador y ley laboral  

E sindicalista Dirksz a declara cu berdaderamente tin cinco interesado. Pero FTA ta compronde cu e compania Hotel BarcelĂł ta negoshando solamente cu  uno;  pero te ainda nan no por yega na un acuerdo.  “E acuerdo ey cu nan a menciona cu nan a yega e no tabata berdad… y ainda nan no a yega”, segun presidente di FTA. Tin un fecha final pa 1 di maart venidero cu sino yega na acuerdo, nan ta bay negosha cu otro interesado.

E preocupacion ta ki dia e trahadonan lo por yega na nan salarionan.  Segun ley laboral nobo ta mara cu ora un compania ta cambia di doño e mester tuma tur e trahadonan cu tabata den servicio y plus carga e responsabilidad di paga nan salario durante e tempo cu nan a keda para sin traha y otro beneficionan, y esaki ta conta tambe pa esun cu ta bay opera e casino aki.

Aparentemente e piedra den sapato pa cera un acuerdo cu e operador nobo di e casino tin di haber cu e pago atrasa di salario cu e anterior operador di Aura Casino a laga atras. Presidente di FTA a indica cu e compromiso aki ta para den ley cu a drenta na vigor aña 2013, ya cu e operador nobo mester tuma “e parti bon y e parti menos bon”.  

FTA dispuesto pa sinta na mesa

Pero FTA di  su banda a declara na e matutino aki cu sindicato ta dispuesto pa sinta na  mesa y papia. “Si esey ta e obstaculo pa e operador nobo tuma e casino over, nos ta dispuesto pa sinta papia na mesa y wak con nos ta haci posibel pa tuma e casino over. Sin tin mester di haci e tardansa aki cu ta causando e trahadonan mas problema”.

Sindicalista Hubert  Dirksz a aclaria cu e trahadonan no por apela na e ley di Cesantia, ya cu e ley aki ta wordo aplica ora cu e casino cera of bati bancarota y e compania ta bay. “Pero te ainda e compania t’ey”, el a bisa.  Loke nan ta wardando aworaki cu e compania Hotel BarcelĂł lo por yega cera un acuerdo cu un operador nobo di nan casino pa mantene  e trahado, uno na empleo y mantene nan salario y beneficionan.

Presidente di FTA a bisa energicamente cu algo mester wordo haci den e mundo di casino pa preveni e sorto di inversionista cu ta bin Aruba pa opera un casino, y despues nan no kier cumpli cu tur loke a wordo poni riba mesa pa cumpli cun’e.  “Esey ta haci cu nan tin caminda habri pa trece problema den mundo di casino y consecuentemente pa nos producto turistico y tambe pa e trahadonan envolvi”, asina el a culmina su declaracion na Bon Dia Aruba.

LEAVE A REPLY

Please enter your comment!
Please enter your name here