Cada minister ta representa pais Aruba

Ayera mainta den corte tabata presente e ciudadano Michael Williams kende ta wordo demanda pa pais Aruba pa rectifica su palabranan cu lo tin bid fixing (corupcion) den e proyecto pa remedia e dump na Parkietenbos. Sentencia di e caso aki lo bin dilanti 29 di juni.

E motibo dicon gobierno ta exigi rectificacion ta paso cu Williams na mas cu un ocasion publicamente lo a declara cu henter e asunto ‘ta hole na corupcion’ y cu ta dicidi caba cu ta un compania cu yama Decco lo haya esaki. Segun gobierno e declaracionnan di Williams ta trece no solamente e proyecto aki sino esnan den futuro bou di un lus negativo.

Mesun midi
Como parti di su defensa, sr. Williams a puntra si di berdad gobierno ta midi tur hende cu mesun midi. A trece dilanti e punto ora cu for di 2001 cu Otmar Oduber tabata parlamentario y tambe minister el a wordo acusa di ta corupto y di ta haci maniobranan coruptivo.

A menciona entre otro Evelyn Wever Croes, Xiomara Ruiz-Maduro, Guillfred Besaril, Dangui Oduber y Booshi Wever como esnan cu lo a acusa sr. Oduber na varios ocasion y nunca sr. Oduber a exigi un rectificacion na nomber di pais Aruba conta un di e personan aki cu ‘awo e ta den gobierno hunto cu nan’. Como ehempel a uza ‘strawberry gate’ y tambe a splica con a hasta entrega prueba na Ministerio Publico (OM), pero awo ‘paso nan ta den gobierno hunto a hayanan obliga di seponeer esaki’ segun sr. Williams ta bisa. E pregunta cu a keda den corte ta cu si gobierno ta midi cu e mesun midi of si ta un ciudadano so ta kies pa ataca.

Ministerraad
Otro parti di defende cu sr. Williams a trece dilanti ta cu segun e ta bisa sr. Oduber na niun momento tabata tin autorisacion y/of mandato di su coleganan pa nan nomber di pais Aruba cuminsa un caso contra di dje.

Williams ta hasta splica cu dos dia pasa bou di invitacion di minister Glenbert Croes, e tabata den e oficina di e minister unda cu segun e, e minister a sigure cu na niun momento un mandato a ser duna. Tambe sr. Williams a menciona cu minister Rudy Lampe tambe lo a haci mescos. Bon Dia Aruba a haci pregunta na gobierno riba esaki y ta pendiente un contesta. Te na e momento aki minister Otmar Oduber di POR tambe no a duna niun declaracion.

Bon Dia Aruba a tuma contacto cu gobierno di Aruba por medio di su vocero Joally Croes kende ta notifica cu ‘cada minister riba su mes cu den su calidad como minister acudi na corte, sea como demandante of defendiente, ta pais Aruba e ta representa’. E vocero ta splica cu no ta asina cu mester di aprobacion di ministerraad pa actua den nomber di pais Aruba. A busca tambe contacto cu vocero di minister Glenbert Croes pero te na e momento aki no a bin un reaccion di su parti. Mas aleu a purba di haya contacto cu minister Otmar Oduber pero e no tabata disponibel ainda pa reacciona riba e caso aki.

EcoGas
Durante henter e caso na varios ocasion a referi na e compania EcoGas como esun cu ta partner di Decco di Cayman Islands y cu ta nan ta esunnan cu lo haya e contracto. Segun sr. Williams a bisa den corte ta cu e compania na Cayman ta esun cu mester entrega e ekiponan necesario.

Mas aleu sr. Williams a splica e hecho cu ya caba tin acuerdo entre Serlimar y EcoGas y tambe cu netamente locual cu e proyecto di Parkietenbos ta encera, ta locual cu EcoGas ya ta haciendo pa algun tempo caba, esta yena bultonan (bale) di sushi biodegradabel den buraconan den tera.

Bon Dia Aruba a tuma contacto cu director di EcoGas, Ramsey Halibi kende a indica cu nan no ta bay reacciona riba e locual cu Williams tin di bisa y lo laga su caso cu gobierno pa loke cu e ta.