Pakico yiu di Harry y Meghan no ta un prins? Aki e splicacion

Un di e acusacionnan mas dramatico den e entrevista di prins Harry y su esposa Meghan cu Oprah Winfrey tabata cu nan yiu homber no a ricibi un titulo real, posiblemente pa motibo di color di su cuero.

Yiu di Harry y Meghan, number shete den linea pa e trono Britanico, ta Archie Mountbatten-Windsor. Den contraste, e yiunan di ruman grandi di Harry, prins William, ta prins George, princess Charlotte y prins Louis.

Meghan a bisa cu tempo cu e tabata na estado, ‘nan’ – asumi cu ta e palacio – ‘tabata bisando cu nan no tabata kier pa e ta un prins… cu lo ta diferente di protocol’. El a implica cu por ta e caso cu ‘e prome miembro color scur den e famia aki no ta haya titulo e mesun forma cu e otro nietonan’.

A rechasa Archie?
Reina Elizabeth II tin nuebe bisnieto, incluyendo Archie. Nan no ta prins y prinsesnan, apart di e tres yiu di prins William, ken ta number dos den linea pa e trono y destina pa un dia bira rey.

Un decreto di rey George V na 1917 ta limita e titulo di prins y prinses na e yiunan di e monarca, yiunan di e yiunan homber di e monarca, y ‘e yiu homber mas grandi di e yiu homber mas grandi di e prins di Wales’ – esta yiu homber di William, prins George.

Bob Morris, di e Unidad di Constitucion na University College London, a bisa cu e regla a ser prepara pa corta e cantidad aumentando di titulonan di prins. “Reina Victoria tabatin nuebe yiu cu tur tabata prins y prinses, y nan a haya yiu, y asina a keda bay, y George V a sinti cu mester a haci algo pa drecha e situacion”, el a bisa.

E reina tin e poder pa amienda e reglanan, y na 2012 el a duna un decreto cu tur yiu di prins William y su esposa, Catherine, no solamente esun di mas grandi, lo ta prins y prinses.

Bao convencion George V, Archie no ta un prins, pero lo bira un prins como e nieto di e monarca unabes cu e actual heredero na e trono, prins Charles, bira rey.

Den su entrevista, Meghan a bisa cu a bis’e cu ‘nan kier cambia e convencion pa Archie’.

No ta cla na kico e tabata referi, pero Morris a bisa cu prins Charles a duna di conoce cu ‘e ta prefera un famia real mas chikito’ na momento cu e asumi e trono.

Archie tabata eligibel pa un ‘titulo di cortesia’ na su nacemento, manera Lord Archie Mountbatten-Windsor. E tempo aya, a reporta cu Harry y Meghan a scoge pa no dun’e un titulo. Pero Meghan a bisa Winfrey cu ‘e no tabata nos decision’.

E titulo ta afecta seguridad di Archie?
Meghan a expresa preocupacion cu sin un titulo, Archie ‘no ta bay ricibi seguridad’.

Pero un titulo real manera prins of prinses no ta trece proteccion di seguridad automaticamente. Miembronan di famia real cu ta traha full-time – incluyendo Harry y Meghan prome cu nan a muda na Merca aña pasa – ta ricibi guardaespaldas di polis paga pa pueblo. Miembronan senior di realesa cu tin un trabao pafo di e famia, manera yiunan muhe di prins Andrew, prinses Beatrice y prinses Eugenie, no ta ricibi esaki.

Kico e palacio ta bisa?
Palacio di Buckingham no a responde na acusacionnan specifico den e entrevista. Den un declaracion, a bisa cu ‘e asuntonan expresa, particularmente esun di rasa, ta preocupante. Mientras cu algun recoleccion por varia, ta tuma esakinan hopi na serio y lo trata esakinan di forma priva den e famia’.