(AP) – Presidente Laurentino Cortizo ayera diahuebs a sanciona un ley cu ta regula e uso di cannabis medicinal na Panama pa loke e nacion aki a bira e prome di Centro America cu ta haci esaki.
E ley nobo, cu tabata den discusion for di cinco aña pasa y a ser aproba finalmente pa e legislativo na final di augustus, ta crea un marco di regulacion cu lo permiti e uso y acceso vigila y controla di cannabis medicinal y su productonan deriva cu fin terapeutico, medico, veterinario, cientifico y di investigacion na e teritorio nacional.
Cu e garantia di Ehecutivo, Panama ta bira e prome pais Centro Americano cu ta establece e marco legal pa e uso medicinal di cannabis den pashentnan cu malesanan cronico. E ley lo drenta na vigor ora e Gaceta Oficial di e pais aki lo sali publica.
Entre otro aspectonan, e norma ta regula e procesonan di comercialisacion, distribucion, disposicion final, uso di simianan autorisa di manera debi pa sembra cannabis, asina como di productonan deriva di cannabis medicinal cu fin medico, terapeutico, veterinario, cientifico y di investigacion.
Varios institucionnan di Estado, Organo Hudicial, gremionan di pashentnan y asociacionnan a interveni den e discusion di e proposicion, cu ta crea un Programa Nacional pa Estudio y Uso Medicinal di Cannabis y su productonan Deriva, un instancia cu lo vigila e necesidadnan di e pashentnan y uso adecua di e mata.
Varios pais Latino Americano a aproba e uso di cannabis medicinal, entre nan Colombia, Chile, Ecuador y Peru.
