Por lo menos 14 miyon persona lo por pasa hamber na Latino America debi na e pandemia creciente di coronavirus, cu ta aisla hende na cas, destrui luganan di trabou y lastra e economia, segun Programa Mundial di Alimento di Nacionnan Uni.

Segun algun prevision nobo publica diaranson den oranan di anochi, a inclui e violento aumento di insiguridad alimentario. Mientras cu na 2019 a afecta 3,4 miyon di persona, e cifra lo por ta cuatro biaha mayor e aña aki den un di e regionnan mas vulnerabel di mundo.

“Nos ta drentando den un fase hopi complica”, Miguel Barreto, director regional di PMA pa Latino America y Caribe a bisa. “Esaki ta loke nos a yama e pandemia di hamber.”

Den tur e region por mira e sombra di hamber. Ciudadanonan desespera no ta cumpli e cuarentena pa sali den busca di placa y cuminda, of nan ta colga bandera cora of blanco desde nan cas pa pidi ayudo. Hopi di e personanan aki ta trahadonan informal cu ta forma un parti di e forsa di trabou Latino Americano, mientras cu otronan a cay den pobresa despues di perde nan trabou memey di un crisis economico historico.

Ta probabel cu e cantidad di persona cu ta pasa hamber ta mayor cu esun cu a wordo calcula pa ONU, cu ta conta e cifranan di e 11 pais unda nan ta opera. Por ehemplo, e calculo no ta inclui Venezuela, na unda un di cada tres persona a pasa hamber e aña pasa, segun un estudio di agencia alimentario na 2019.

E pandemia COVID-19 ta castiga Latino America. Brasil ta e di dos pais na mundo cu mas hende infecta, tras di Merca, y e cifranan ta aumenta na Peru, Chile, Mexico y otro luganan, loke ta aumenta e presion riba hospitalnan y poblacionnan pober tanto den zona rural como urbano.

LEAVE A REPLY

Please enter your comment!
Please enter your name here