Un parke Chines a provoca un ola di indignacion riba rednan social despues di obliga un porco pa bula for di un toren di 68 meter di haltura. Riba video por mira con e animal ta mara na un palo, hiba pa dos hende homber te na punta di toren pa asina push’e.

E parke ubica na Chongqing a bisa cu ta trata di un triki cu a realisa pa marca e apertura di e atraccion nobo di bungee jumping. Medionan local a bisa cu a manda e porco pa mat’e despues. E triki aki a pone cu varios hende a rabia, reflehando e aumento di importancia di derecho di bestia den e poblacion Chines.

Despues e parke a duna un declaracion, bisando cu nan ta acepta tur critica y nan a pidi pordon na e publico. “Nos lo mehora marketing di nos luga turistico pa provee turistanan un miho servicio.”

E incidente a tuma luga dia 18 januari, na e parke Meizin Red Wine Town na Chingqing. E evento publico – cual organisadonan a yama e bungee jump di e porco di oro – a tuma luga pa celebra apertura di atraccion di bungee di e parke.

Segun informacion local, e porco tabata pisa 75kg. Riba video di e incidente por tende con e porco ta cuminsa grita. Locual ta sucede despues na e bestia no ta mustra mas, aunke informe di medio local ta bisa cu finalmente a hiba e animal abattoir.

Crueldad contra animal no ta castigabel pa ley na China, sinembargo tin un aumento den consciencia di asuntonan relaciona cu bienestar animal den añanan recien. Aunke algun persona a defende e incidente bisando cu ‘no ta diferente pa mata un porco pa come’, otro a condena e compania su accion como ‘un manera vulgar pa haci marketing’. Un otro persona a bisa cu mata bestia pa consumo y trata nan cruelmente pa otro hende entretene ta dos cos diferente, ‘no tin mester di tortura nan asina’.

“Porco ta experimenta dolor y miedo na e mesun manera cu nos hende humano. Y e triki repugnante di relacion publico mester ta ilegal”, segun Jason Baker, vicepresidente di campaña internacional di Peta, a bisa BBC News.

LEAVE A REPLY

Please enter your comment!
Please enter your name here