Prome SKOA Expo a resulta un exito rotundo: Creatividad y union di maestronan a resalta den SKOA Expo

Cu e participacion di 46 scol Catolico cu ta cay bou e maneho di fundacion SKOA, a tuma luga nan prome exposicion bou e nomber di SKOA Expo, diasabra ultimo na Renaissance Conference Center.

Un SKOA Expo cu a wordo caracterisa pa e presencia di hopi bishitante, creatividad di e docentenan y bunitesa di e exposicion aki. “Mi sentimento ta un sentimento di satisfaccion. Un sentimento cu nos a uni como un famia grandi di SKOA. Nos a haci esaki un realidad” directora di SKOA, Anusca Baly a declara na Bon Dia Aruba. E tabata inmensamente contento cu e resultado di e expo aki, y e ta haya cu e ta un comienso di e chispa pa e siguiente expo cu lo ta otro aña.

El a probecha e oportunidad aki pa manda su mensahe pa cada un di e cabesantenan y di e docentenan participante den e expo aki cu a entrega nan dia liber ariba diasabra ultimo. Pero principalmente, el a expresa su gratitud na nan, pasobra nan a kere den e proyecto aki, y nan a bin pa sostene nan fundacion SKOA.

“Mi ta bisa nan di curason, masha danki pa sostene SKOA. Pasobra nos tur, cada un di nos ta SKOA,” el a bisa. Baly ta masha gradicido tambe, ya cu cada un di nan a bin motiva, cu hopi animo y energia pa logra cu SKOA Expo ta un exito rotundo.

Minister di Enseñansa.
Minister di Enseñansa, Ciencia y Desaroyo Sostenibel, Rudy Lampe a bishita e expo aki, unda e tabatin e oportunidad di papia cu diferente participante, caminda e ta haya cu e evento aki tabata un ‘tremendo’ iniciativa di parti di SKOA.

“Mi kier felicita SKOA, tur e maestronan, tur e scolnan cu a participa.” Ademas e ta considera e expo aki como un exito. “Pabien na un y tur cu e exito aki,” segun e minister. El ta haya cu nan a haci e expo aki hopi atractivo pa tur hende interesa por a busca informacion.

Algo cu e mandatario a elogia ta e creatividad enorme di nos maestronan. Un creatividad cu ta wordo reconoci te hasta na Hulanda. Lampe a bisa Bon Dia Aruba cu ora e ta papia cu e representantenan di e institucionnan cu ta prepara nos docentenan na Hulanda, nan ta bisa cu ‘na Aruba nan ta impresiona pa e creatividad di e maestro. E mente creativo di e maestronan.”

Despues cu comunidad a wordo conmovi pa e incidente desagradabel cu a sosode siman pasa na Cacique Macuarima School, Lampe ta haya cu e expo aki organisa pa SKOA ta trece un reflexion hopi positivo. Un refleho di esaki tabata cu e mesun team di e scol menciona tabata presente den e expo aki. “Kiermen no a kibra e animo di e team! Nan tur ta akinan di Macuarima y nan ta sigui padilanti,” el a bisa.

SKOA Expo ta un prome iniciativa y e mandatario ta consider’e como un ehempel pa otro nan, y ‘sin duda un bon ehempel semper lo wordo sigui,’ e minister a declara.