Durante reunion publico den Parlamento pa aumenta castigo maximo pa delitonan sexual, parlamentario Alan Howell a expresa cu e tema aki no ta uno bunita y cu ta toca hopi hende, haciendo di dje un realidad. “Den bida ora cosnan ta realidad bo tin di enfrenta nan, maske con duro nan por ta”.

E ta considera cu ta importante pa sa cu nos pais tin e trias politica y den e sistema aki, Parlamento tin su rol pa por aproba y traha cierto leynan. Tambe tin e parti cu ta den hues nan man y como parlamentario no por crusa e liña cu ta toca nan, mientras cu e huesnan no ta supone di crusa e liña cu ta toca e parlamentarionan.

Howell ta indica cu e ta concentra riba esaki, pasobra hopi biaha pueblo no ta compronde e division aki y hopi biaha e politiconan, e instancianan y ministernan (den e caso aki di Husticia, Asunto Social y Enseñansa) ta haya e golpinan di mas duro cerca pueblo, pasobra den nan opinion ta cu nan mester ta mas estricto.

Parlamentario di POR ta di opinion cu esakinan mester bay man den man cu otro, Parlamento mester percura pa bin cu leynan cu por proteha y leynan cu ta na bienestar di nos ciudadanonan, pero di otro banda, hues tambe tin cu haci su trabou. “Gobierno por haci su trabou di cambia ley, Parlamento por haci su trabou di bin cu ley of aproba un ley, pero na final di dia, toch ora di duna sentencia e ta keda for di man di Parlamento of for di man di cualkier minister di Husticia”.

Gobierno y Parlamento ta haciendo nan trabou, ta haciendo cambio di ley pa enforsa esakinan pa asina por ataca e problema miho y proteha esnan cu ta wordo abusa y tambe pa mantene nos pueblo trankilo.

E ta comparti opinion di algun di su coleganan cu ta expresa cu esaki kisas no ta e miho remedi ainda, pero cu tin cu haci algo, pasobra pueblo ta spera di Parlamento y Gobierno pa haci algo. P’esey e ta gradici minister pa presenta e ley, pa demostra cu nan ta haciendo nan trabou y pa demostra tambe cu nan ta contra di abuso di mucha den tur sentido.

E cambio di ley aki no ta atende solamente e aumento di castigo maximo, pero tambe e parti unda cu esnan cera na prison pa abuso sexual, independiente di e tempo cu falta pa nan sinta nan castigo, nan no lo bin na remarca pa bay cas prome cu ora debi na problema di espacio. Esaki tabata sosode prome; ora KIA ta yen y pa haci espacio ta laga liber esun cu ta mas cerca pa bay cas pa crea espacio pa esnan cu mester drenta sin tene cuenta e tipo di delito cu e ta cera pe.

Tambe a pone den ley cu e personanan cu a comete delitonan sexual no por bin na remarca pa bay cas trempan pasobra nan a comporta nan mes bon den prison, cual Howell ta haya importante y cu no tabata existi antes.

“Mi ta bin cu e puntonan aki pasobra mi ta compronde e preocupacion di mi coleganan cu kisas esaki no ta e miho remedi, pero esakinan ta hermentnan cu nos por sigui uza pa nos yega unda nos tin cu yega”.

Pa loke ta e ley di iniciativa pa castigo minimo cu Howell a presenta hunto cu su colega e tempo ey den Parlamento, Marisol Lopez-Tromp, el a bisa cu esaki a bay Conseho Consultativo y na e momentonan aki ta revisando tur e consehonan cu e organo aki a duna. “Ohala dentro di poco nos expertonan cu ta trahando riba e ahustacionnan cu tin cu haci keda cla y dentro di poco e lo ta den Parlamento pa wordo trata”, Howell a expresa.
E ta agrega cu e lucha y preocupacion di comunidad riba e tema aki ta un dolor grandi, mas ainda ora mira e cifranan gigantesco di cantidad di abuso di mucha riba nos isla. “Nos tur tin cu haci algo cu esaki pa asina nos por evita e tipo di e casonan aki”.

Finalisando, Howell a haci un invitacion na pueblo en general pa acudi masalmente na e manifestacion di dia 3 di juli contra abuso di mucha, pasobra ta comunidad den su totalidad mester manda e señal cu ta basta.

LEAVE A REPLY

Please enter your comment!
Please enter your name here