Parlamentario Alan Howell, mescos cu henter pueblo di Aruba a keda hopi contento cu anuncio di Gabinete Wever-Croes cu entrante januari 2020 prijs di coriente lo baha. Howell a recorda cu riba 23 di april 2018 el a presenta un mocion a traves di su fraccion y cu a haya sosten di mayoria di Parlamento cu e peticion pa baha prijs di awa y coriente. Awe por mira cu Gobierno a haci tur nan ehercicio pa logra e reduccion cu a pidi aña pasa y a logra cumpli cune.
Entrante 1 di januari 2020 prijs di coriente lo baha cu 10% pa casnan, 7% pa comercio y 9% pa scol, fundacion y misa. E rebaho di prijs aki ta significa cu si cont’e den un periodo di un aña, lo haya aproximadamente un luna gratis di coriente.
Pa loke ta consume domestico mester aclaria si cu e reduccion ta varia segun e consumo. Esunnan cu consumi entre 0 y 500 kWH lo ricibi un rebaho di 9.9%; esunnan cu consumi entre 500 kWH y 1000 kWH lo ricibi un rebaho di 10.4%; y esunnan cu consumi riba 1000 kWH lo ricibi un rebaho di 8.4%.
Alan Howell a expresa cu e ta contento cu den su funcion di parlamentario di pueblo e por a presenta un mocion pa baha coriente y awe despues di a busca e forma mas responsabel pa haci esaki, Gobierno ta ehecuta loke a pidi den Parlamento dia 23 di april 2018. Lamentablemente e mocion aki cu tan a beneficio y bienestar di pueblo, a pesar di a conta cu sosten di mayoria den Parlamento, no a conta cu sosten di miembronan di oposicion. Pero, nan tambe, como ciudadano di nos isla lo bay mira y sinti e beneficio pa pueblo cu a wordo logra sin nan apoyo.
Finalisando e parlamentario di POR a felicita Gobierno y henter Aruba cu e logro aki, cual sigur lo beneficia cartera di cada un di nos ciudadanonan.
